O‘zbekistonda o‘tgan to‘qqiz oy ichida tovarlar va xizmatlar narxi qanchaga oshgani ma’lum qilindi

O‘zbekistonda yanvar—sentabr oylari davomida iste’mol bozoridagi narxlar va tariflar o‘rtacha 6,3 foizga oshdi. 2019-yilning sentabr oyigacha nisbatan olinsa, tovarlar va xizmatlar narxlarining o‘rtacha o‘sishi 11,7 foizni tashkil etdi. Bu haqda Davlat statistika qo‘mitasi ma’lumotlariga tayanib, “Gazeta.uz” xabar berdi.

Bu yilning yanvar—sentabr oylari davomida narxlarning eng ko‘p o‘sishi aprel oyiga to‘g‘ri keldi (1,7 foiz), narxlarning umumiy pasayishi, ya’ni deflyatsiya holati iyun (-0,2 foiz) va iyul (-0,3 foiz) oylarida kuzatildi.

Tovarlar va xizmatlar asosiy guruhlari kesimida qarab o‘tsak, yanvar—sentabr oylari davomida oziq-ovqat mahsulotlarining narxlari 3,1 foizga, nooziq-ovqat mahsulotlar 2,1 foizga, xizmatlar 1,1 foizga oshdi. O‘tgan yilning sentabr oyiga nisbatan oziq-ovqat va nooziq-ovqat mahsulotlar, shuningdek, xizmatlar narxlarining o‘sishi mos ravishda 7,5 foiz, 2,8 foiz va 1,4 foizni tashkil etdi.

Oziq-ovqat mahsulotlari narxlarining o‘zgarishi

Oziq-ovqat mahsulotlari narxlarining eng ko‘p o‘sish holati aprel oyida kuzatildi (1,4 foiz) va narxlarning pasayishi iyun (-0,5 foiz) va iyul (-0,6 foiz) oylariga to‘g‘ri keldi.

Bu yilning yanvar—sentabr oylarida non mahsulotlari narxlari o‘sishining eng yuqori darajasi aprelda qayd etilib, ushbu guruh tovarlari narxlari o‘rtacha 4,3 foizga ko‘tarilgan. Ushbu guruh narxlarining yanvar—sentabr oylari davomidagi o‘rtacha oylik o‘sish sur’ati 1,4 foizni tashkil etdi.

Go‘sht, parranda go‘shti va baliq mahsulotlari narxlarining oy davomidagi yuqori o‘sishi sentabrda (3,8 foiz), past sur’atlarda o‘sishi esa yanvar, iyun va iyul oylarida qayd etilgan (0,4 foizdan). Go‘sht mahsulotlari narxlari oy davomida o‘rtacha 3,8 foizga (yil boshidan 14,2 foiz) qimmatlashdi.

Bu yilning yanvar—sentabrida meva-sabzavot mahsulotlari narxlarining oy davomidagi yuqori o‘sishi aprelda (6,6 foiz), pasayishi esa iyun oyida (-8,4 foizga) qayd etilgan. Sentabr oyida guruh narxlarining o‘sish sur’ati 3,0 foiznini tashkil etdi. 2020-yilning sentabr oyida ushbu guruh mahsulotlaridan anor (15,5 foiz), karam (14,1 foiz), shaftoli (14,2 foiz) va banan (14,0 foiz) narxlari sezilarli darajada qimmatlashdi. Shu bilan bir qatorda, pomidor (-6,4 foiz), bulg‘or qalampiri (-6,3 foiz), limon (-6,1 foiz), olma (-1,4 foiz) narxlarining arzonlashganligi qayd etildi.

Nooziq-ovqat mahsulotlari narxlarining o‘zgarishi

Nooziq-ovqat mahsulotlari narxlarining eng ko‘p o‘sish holati sentabr oyida kuzatildi (0,4 foiz) va narxlar o‘sishining eng kichik qiymati yanvar oyiga (0,1 foiz) to‘g‘ri keldi.

2020-yilning yanvar—sentabr oylarida nooziq-ovqat mahsulotlarning o‘rtacha oylik o‘sish sur’ati 0,6 foizni tashkil etdi. 2020-yilning sentabrida nooziq-ovqat mahsulotlarning asosiy guruhlari orasida narxlarning oy davomida o‘sishi bo‘yicha yetakchi o‘rin avtomobillar uchun yoqilg‘i narxlariga tegishli bo‘lib, bunda narxlarning 3,4 foizga o‘sishi kuzatilgan.

Xizmatlar narxlarining o‘zgarishi

Xizmatlar narxlarining eng ko‘p o‘sish holati mart va may oylarida kuzatildi (0,2 foizdan), qolgan oylarda narxlarning o‘sishi 0,1 foizdan bo‘ldi.

Joriy yilning sentabr oyida tariflarning o‘sishi bo‘yicha yetakchilik yo‘lovchi tashish transporti xizmatlariga tegishli bo‘lib, narxlar oy davomida 1,6 foizga, shu jumladan, havo transporti 0,9 foizga, temir yo‘l transporti 0,3 foizga, avtomobil transporti xizmatlari 2,1 foizga qimmatlashdi. Pandemiya sharoitida aholining to‘lov qobiliyatini mustahkamlash maqsadida, mamlakatning davlat oliy ta’lim muassasalarida shartnoma asosida kunduzgi o‘qish uchun tayanch to‘lov miqdoriga chegirmalar qo‘llanilganligi ta’lim sohasidagi xizmatlar umumiy narxlarining o‘rtacha 2,3 foizga pasayishiga olib keldi.

Umumiy hisobda, bu yilning yanvar—sentabr oylarida narxlarning o‘sishi bo‘yicha yetakchi pog‘onalarni davlat maktabgacha ta’lim tashkiloti xizmatlari (15,2 foiz), dam olish (8,8 foiz), maishiy xizmatlar (8,3 foiz), shuningdek, yo‘lovchi tashish transporti xizmatlari (8,0 foiz) narxlari band etdi.