Ўзбекистон ташқи ишлар вазири Абдулазиз Комилов 2020 йилнинг 14 октябрь куни Ҳиндистоннинг янги тайинланган фавқулодда ва мухтор элчиси Маниш Прабҳатни қабул қилди. Бу ҳақда Ташқи ишлар вазирлиги хабар берди.
Таъкидланишича, вазир ишонч ёрлиқлари нусхаларини қабул қилиб олар экан, дўст Ҳиндистон мамлакати элчисини қутлади, уни юқори ва масъулиятли лавозимга тайинлангани билан табриклади ҳамда самарали фаолият тилади.
Суҳбат давомида сиёсий, савдо-иқтисодий, инвестиция, маданий-гуманитар ва бошқа соҳалардаги икки томонлама муносабатларнинг ҳолати ҳамда ривожланиш истиқболлари кўриб чиқилди.
Ўзбекистон—Ҳиндистон муносабатлари ривожланишнинг сифат жиҳатидан янги босқичига кўтарилиб, ижобий суръат касб этаётгани қайд этилди. Олий даражадаги мунтазам мулоқотлар икки томонлама стратегик шерикликни мустаҳкамлашга замин яратмоқда.
Томонлар турли даражаларда бўлиб ўтадиган қўшма тадбирлар жадвали бўйича фикр алмашди. Хусусан, икки мамлакат ташқи ишлар идоралари ўртасида навбатдаги сиёсий маслаҳатлашувларни ўтказиш таклиф қилинди.
Коронавирус пандемиясининг икки томонлама савдо-иқтисодий муносабатларга салбий таъсири олдини олиш ва ўзаро савдо ҳажмини янада ошириш юзасидан қўшимча чоралар кўриш зарурлиги таъкидланди.
Тиббиёт, фармацевтика, таълим ва инновация соҳаларида инвестиция лойиҳаларини амалга оширишни давом эттириш масалаларига алоҳида эътибор қаратилди.
Ўзбекистон ва Ҳиндистон ўртасида сайёҳлик алмашинувини қайта тиклаш, ўзаро сайёҳлар оқимини оширишга қизиқиш билдирилди.
Эслатиб ўтамиз, Ҳиндистоннинг Ўзбекистондаги аввалги элчиси Сантош Жа 2020 йилнинг июль ойида дипломатик миссиясини якунлаганди.
Аввалроқ Абдулазиз Комилов Покистоннинг Ўзбекистондаги янги элчиси Сайид Али Асад Ғилонийдан ишонч ёрлиқлари нусхаларини қабул қилиб олганди.
Изоҳ (0)