Navoiy viloyati hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari o‘zgardi, deb xabar bermoqda viloyat hokimligi matbuot xizmati.
2015-yildan buyon mazkur lavozimda ishlab kelgan Komiljon Rasulovning boshqa ishga o‘tganligi sababli “Qishloq qurilish invest” MCHJ injiniring kompaniyasi Navoiy viloyat filiali direktori Bekzod Bobomurodov hokim o‘rinbosari etib tayinlandi.
Bekzod Bobomurodov 1983-yilda Navoiy viloyatining Qiziltepa tumanida tug‘ilgan. Tojikiston Respublikasi Xo‘jand davlat universiteti hamda Toshkent moliya institutini tamomlagan.
Bekzod Bobomurodov mehnat faoliyati davomida Iste’molchilar huquqlarini himoya qilish federatsiyasi Navoiy viloyati hududiy birlashmasi raisi, Navoiy viloyati qurilishda tanlov savdolari va narxlarni shakllantirish hududiy konsalting markazi direktori kabi mas’ul lavozimlarda ishlagan.
Avvalroq Jahongir Hotamov Akmalxo‘ja Mavlonov o‘rniga Namangan viloyati prokurori etib tayinlangani, Akmalxo‘ja Mavlonovning o‘zi esa O‘zbekiston bosh prokurori o‘rinbosari etib tayinlangani xabar berilgan edi. Shuningdek, Qamashida rahbarlik qilgan Sherali Sanayev Mirishkor tumaniga hokim etib tayinlangani, Sherali Sanayevning o‘rniga Vazirlar Mahkamasida ishlab kelgan Botir Tog‘ayev tayinlangani ma’lum qilingan.