AQSH prezidenti Donald Tramp 20-iyul kuni BAAdan deportatsiya qilinishi kutilayotgan afg‘onlarni qutqarishga va’da berdi. Bu haqda Anadolu xabar berdi.
Trampning ta’kidlashicha, BAA rasmiylari Abu Dabidagi qochqinlar lagerida 4 yildan beri saqlanayotgan 32 nafar afg‘onistonlikni deportatsiya qilib, ularni “Tolibon”ga topshirishni rejalashtirgan.
“Men hozirdan boshlab ularni qutqarishga harakat qilaman”, deb yozgan Tramp Truth Social’da.
Ma’lum qilinishicha, lager xodimlari qochqin afg‘onlarning pasportlarini olib qo‘ygan. BMTning Afg‘onistondagi inson huquqlari bo‘yicha maxsus ma’ruzachisi Richard Bennet 19-iyul kuni BAA hukumatining deportatsiya rejalarini zudlik bilan to‘xtatishga chaqirib, vaziyatdan chuqur xavotir bildirgan.
“Afg‘oniston xavfsiz emas. Mamlakatga qaytishga majbur qilinganlarni ta’qib va zo‘ravonlik kutadi”, dedi BMT rasmiysi.
Ma’lumot uchun, “Tolibon” 2021-yil avgust oyida Afg‘oniston hukumat kuchlari qulashi va AQSHning mamlakatni tark etishi ortidan hokimiyatni egallab olgandi.
Izoh (0)