Markaziy banklar avgust oyida oltin sotib olishdan ko‘ra ko‘proq sotdi, deb xabar bermoqda Spot Umumjahon oltin kengashi (WGC) ma’lumotlariga tayanib.
Shunday qilib har oy to‘planuvchi oltinning bir yarim yillik sikli yakunlandi. Oltin 2019-yil boshida 1500 dollardan biroz oshib, avgust oyining boshida rekord darajagacha — 2072,50 dollarga ko‘tarildi, so‘ngra taxminan 1900 dollarga tushdi.
Yevropa va amerikalik investorlar pandemiya davrida kafil sifatida oltin g‘amlab olib, uning narxi ko‘tarilishiga sababchi bo‘lgan. Ammo zargarlik buyumlari sotib oluvchilar va markaziy banklar kabi boshqa yirik iste’molchilar tomonidan talab zaif bo‘lgan.
WGC ma’lumotlariga ko‘ra, umumiy hisobda qiymati 2 trillion dollar bo‘lgan taxminan 35 ming tonna oltinni saqlovchi markaziy banklar avgust oyida sotib olinganidan 12,4 tonna ko‘proq oltin sotgan. O‘zbekiston esa 31,7 tonna oltin sotgan.
Oltinning O‘zbekiston iqtisodiyotidagi o‘rni va ahamiyati
Avval xabar berilganidek, oltin eksporti 2020-yil yanvar–avgust oylaridagi O‘zbekiston jami eksport ulushining 50 foizini tashkil etdi. Pul ekvivalentida mamlakat tomonidan 2020-yilning 8 oyida sotilgan oltin qiymati 5,8 milliard dollarga teng bo‘lgan. Bu ko‘rsatkich o‘tgan yilning mos davriga nisbatan 47,2 foizga yoki 1,8 milliard dollarga ko‘p.
Besh yildan buyon O‘zbekistonda oltin eksporti o‘sib kelmoqda. Masalan, oltin eksporti 2015-yilda 823,9 million dollarni, 2016-yilda — 738,2 million dollarni, 2017-yilda — 1,6 milliard dollarni, 2018-yilda esa 3,4 milliard dollarni, 2019-yilda esa 4,9 milliard dollarni tashkil etgan.
O‘zbekiston 2020-yilning iyul oyida oltin sotish bo‘yicha dunyoda mutlaq yetakchi bo‘ldi. Mamlakat 11,6 tonna oltin sotdi. Ikkinchi o‘rinni Mo‘g‘uliston 6,1 tonna bilan egallagan. Rossiya va Germaniyaning har biri 0,5 tonnadan oltin eksport qilgan.
Eslatib o‘tamiz, sentabr oyi boshlarida O‘zbekiston oltin-valyuta zaxiralari may oyidan buyon birinchi bor qisqardi. Mamlakatning rasmiy zaxira aktivlari 1-sentabr holatiga ko‘ra, 34,6 milliard dollarni, xalqaro zaxiralar — 33,8 milliard dollarni tashkil etdi. O‘zbekiston o‘z oltinlarini faol sotgani pandemiya davriga to‘g‘ri keldi. Kapital bozorini rivojlantirish agentligi direktori Otabek Nazirov oltin-valyuta zaxirasini sotib, mablag‘larni mamlakat iqtisodiyotini qutqarishga va ishsizlar soni ortishining oldini olishga yo‘naltirish mumkinligini aytgandi.
Izoh (0)