«Биз ҳокимларни сайлаш тизимига ўтишимиз керак» — Шерзод Кудбиев

Ўзбекистон ҳокимларни халқ томонидан сайлаш тизимига ўтиши керак, аммо бунга тайёргарлик кўриш лозим. «Gazeta.uz»нинг маълум қилишича, бу ҳақда Давлат солиқ қўмитаси раиси Шерзод Кудбиев «Alter Ego» лойиҳасига берган интервьюсида айтиб ўтди.

Президент Шавкат Мирзиёев ҳокимлар лавозимини сайланадиган қилиш таклифи билан биринчи марта 2016 йил декабрида чиққанди. 2017 йил августида у ҳокимларни халқ томонидан сайлаш тизимини «ҳозироқ» жорий этишга тайёрлигини билдирган.

2020 йилнинг сентябрь ойида давлат раҳбари Ўзбекистон ҳокимларни сайлаш тизимига ўтишини яна бир бор таъкидлаган. Шу билан бирга, ривожланиш даражаси «қониқарсиз» ҳамда «ўрта» деб баҳоланган туман ва шаҳарларда инқирозга қарши бошқарув тизими жорий этилиши маълум қилинган. Яъни, уларга раҳбарлик қилиш истагини билдирган ҳар қандай талабгор ҳудудни ривожлантириш дастурини маҳаллий кенгашларда ҳимоя қилиши мумкин. Халқ вакилларини ишонтира олган салоҳиятли кишилар бутун жамоаси билан туманга раҳбар этиб тайинланади.

Демократия ҳақида гапирар экан, у ДСҚга ишга олинган қиз билан бўлган суҳбатни мисол тариқасида келтирди. Шерзод Кудбиев суҳбатни давлат тилида олиб борган, номзод эса саволларга рус тилида жавоб берган. Ўзбек тилида жавоб беришни сўрашганда, у ўзи маъқул деб топган тилда гаплашиш ҳуқуқига эга эканлигини айтган.

«Ҳа, лекин сизнинг ҳуқуқингиз менинг ҳуқуқим бошланган жойда тугайди. Демократия масаласида бу ҳақда унутмаслигимиз керак. Демократия энг аввало улкан масъулият эканлигини унутмаслигимиз керак. Бизда демократияни хоҳлаган нарсамни қила олишим деб тушунишади. Йўқ, сиз хоҳлаган нарсангизни қилишингиз мумкин, агар бу менинг манфаатларимга зарар етказмаса. Мана шу демократия. Тизимда адолат мезони бўлиши керак», — дея тушунтиган у.

Давлат солиқ қўмитаси раҳбари ҳокимларни халқ томонидан сайлаш механизмини тўғри деб ҳисоблайди.

Қўмита раиси, шунингдек, қўл остидаги ходимлар билан қўпол муомала қиладиган раҳбарлар ҳақида ҳам тўхталиб ўтди. «Бунга (қўполлик — таҳр.) мутлақо эҳтиёж йўқ. Бунга қатъиян йўл қўйиб бўлмайди. Ҳеч ким ҳеч қачон бирор бир ҳокимга, умуман, мансабдор шахсга — вазирга ҳам, раисга ҳам, бўлим бошлиғига ҳам, ўз қўли остидаги ходимларини қадр-қимматини оёқости қилиш ҳуқуқини бермаган. Мен бир пайтлар меҳнат вазири эдим, шунинг учун мажбурий меҳнат, бундай муомала масалалари... ҳеч қачон ҳеч кимга бундай ҳуқуқ берилмаган. Ва Ўзбекистон келажаги бу билан боғлиқ эмас», — деб таъкидлаган у.

Шерзод Кудбиев қўполлик қиладиган раҳбарларни заиф деб ҳисоблайди. «Бу нотўғри ёндашув. Бу ўзларининг касбий, ташкилотчилик қобилиятлари билан одамни ишлашга ундай олмасликлари,  маъмурий йўл билангина бажаришга мажбур қилишларини кўрсатади. Бу нотўгри. Бу одамнинг заифлигидан далолат беради», — деган ДСҚ раҳбари.

Шерзод Кудбиев аввалроқ Тошкент шаҳрининг Мирзо-Улуғбек тумани ҳокими (2016—2018), Бандлик ва меҳнат муносабатлари вазири (2018—2019), Президентнинг давлат хизмати ва ваколатли ҳокимият билан ўзаро алоқалар бўйича маслаҳатчиси (2019—2020) лавозимларида фаолият юритган, шу йилнинг май ойидан буён эса Давлат солиқ қўмитаси раиси лавозимида ишлаб келмоқда.