Poytaxt hayvonot bog‘ida katta o‘zgarishlar bo‘lishi kutilmoqda. Bu haqda “Gazeta.uz”ga Toshkent hayvonot bog‘i rahbari Abduhofiz Rustamov ma’lum qilgan.

Foto: “Gazeta.uz”

Qayd etilishicha, attraksionlar uzoqroq joyga ko‘chirib o‘tkaziladi, hayvonlar va tashrif buyuruvchilar uchun esa sharoit yaxshilanadi. “Rekonstruksiya loyihasi deyarli tayyor bo‘lgan va hozirda to‘lov va investitsiyani muhokama qilish bosqichida turibmiz”, — degan Abduhofiz Rustamov.

Uning aytishicha, rekonstruksiya uchun hayvonot bog‘ini butunlay yopish rejalashtirilmagan, hammasi bosqichma-bosqich amalga oshiriladi. Hozirda mutaxassislar Toshkentga zebra, karkidon hamda bir juft fil va jirafani olib kelish ustida ishlamoqda. “Odamlar nafaqat chet elning, balki o‘zimizning ham hayvonlarimizni tomosha qilishlari uchun Surxondaryo va Buxorodan arxarlar, marxurlar, sayg‘oqlarni olib kelishni rejalashtiryapmiz”, — deb ta’kidlagan hayvonot bog‘i rahbari.

Shuningdek, ayrim darslar hayvonot bog‘ida o‘tilishi uchun Xalq ta’limi vazirligi bilan muzokaralar olib borilayotganini bildirgan. Buning uchun maktablar transport va gid bilan ta’minlanadi, o‘quvchilar esa hayvonlarni darsliklardan emas, balki jonli ravishda ko‘rib o‘rganadi.

“Televizor va monitor faqat suratini beradi xolos, ushlab ko‘rish imkonini bermaydi. Chet el hayvonot bog‘larida yosh mehmonlarga do‘stona hayvonlarga yaqinlashish va ularni silash uchun ruxsat berilishi bejiz emas. Shunday qilib, qo‘rquvdan xalos bo‘lish mumkin. Ehtimol, Toshkentda ham shunga o‘xshash narsa paydo bo‘lar. Bolalar berahm bo‘lib ulg‘aymasliklari uchun hayvonlarga nisbatan mehr uyg‘otish kerak”, — deydi Abduhofiz Rustamov.