Sirdaryoda yo‘lning belgilanmagan qismidan kesib o‘tayotgan piyodani Nexia urib ketdi. Jabrlanuvchi voqea joyida vafot etdi

Sirdaryo viloyatida tunda yo‘lning belgilanmagan qismidan kesib o‘tayotgan piyodani Nexia-2 avtomobili urib ketdi, deya xabar bermoqda IIV.

Ma’lum qilinishicha, 2020-yilning 30-sentabr kuni soat 03:00 larda 1963-yilda Buxoro viloyatida tug‘ilgan fuqaro o‘ziga tegishli bo‘lgan Nexia-2 avtomashinani Sirdaryo viloyati Oqoltin tumani hududidan o‘tgan M-39 avtomobil yo‘lining 920-kilometrida Termiz–Toshkent yo‘nalishi bo‘yicha boshqarib ketayotgan bo‘lgan.

Shu vaqtda u yo‘lning piyodalar o‘tishi uchun mo‘ljallangan qismi mavjud bo‘lmagan joyda yo‘lni chap tomondan o‘ng tomonga kesib o‘tayotgan piyoda O.T.ni urib yuborib, YTH sodir etgan.

Natijada piyoda O.T. olgan tan jarohatlarining og‘irlik darajasi bo‘yicha voqea joyida vafot etgan.

Holat yuzasidan Oqoltin tumani IIB huzuridagi Tergov bo‘linmasi tomonidan surishtiruv ishlari olib borilmoqda.