Ҳаж сафари учун йиғилган маблағини маҳалладошлари учун янги трансформатор олишга сарфлаган сурхондарёлик ҳожи она — Бибимарзия Жамиловага «Меҳр-саховат» кўкрак нишони топширилди. Бу ҳақда «Дарё»га Сариосиё туман ҳокимлиги ахборот хизмати раҳбари Муродбек Давлатов хабар берди.
Маълум бўлишича, Президент Шавкат Мирзиёевнинг 2020 йил 26 августдаги фармонига кўра, «Меҳр-саховат» кўкрак нишони билан тақдирланганлар орасида 16 нафар сариосиёлик ҳам бор.
«Гулобод» маҳалласида яшовчи Камолиддин ҳожи ота ва турмуш ўртоғи Бибимарзия ҳожи она навбатдаги Ҳаж зиёрати учун деб йиғган 70 миллион сўм нафақа пулини ‘Саховат ва кўмак’ умумхалқ ҳаракати доирасида ўзлари яшаётган маҳалла аҳолисининг электр энергия таъминотини яхшилаш учун янги замонавий трансформаторга сарфлаганди. Бугун ўша хайр-у саховат ўз мевасини берди. Ҳожи она Президентимиз эътирофига сазовор бўлди», — дейди Муродбек Давлатов.
29 сентябрь куни туман ҳокими Ўктам Тўраев онахонга кўкрак нишонни топширган.
«Турмуш ўртоғим билан яна бир бор Ҳаж зиёратига боришни ният қилгандик, — дейди «Гулобод» маҳалласида яшовчи Бибимарзия ҳожи ая Жамилова. — Бу йил халқимиз бошига оғир синовлар тушди. Шунда имкониятимиз даражасида қўлимиздан келганча халқимизга ёрдам қилишни ният қилдик. Аҳоли кўпайганлиги учун электр энергияда узилишлар бўлаётганлиги сабабли чолим йиғган маблағимиздан трансформатор олишни таклиф қилди. Бажонидил рози бўлдим. Болаларимиз ҳам маъқуллашди, ҳаттоки етмаганини ўзлари қўшишди. Очиғи буни айтишни хоҳламаган эдим, сўраганингиз учун ошкор қилдим. Шу арзимас хизматимизни Президентимиз эътироф этганларидан жуда хурсанд бўлдик. Илоҳим шу балолар кўтарилиб, халқимиз тинч ва саломат бўлсин».
Мавзуга доир:
Изоҳ (0)