Falsafa, adabiyot va pedagogika fanlari bo‘yicha taniqli olim, O‘zbekiston Fanlar akademiyasining akademigi Jumanazar Bazarbayev 25-sentabr kuni 87 yoshida vafot etdi. Bu haqda Fanlar akademiyasi xabar berdi. O‘zAning ma’lum qilishicha, olimning vafoti munosabati bilan Prezident Shavkat Mirziyoyev, bosh vazir Abdulla Aripov, Senat raisi Tanzila Norboyeva, Fanlar akademiyasi prezidenti Behzod Yo‘ldoshev va boshqalar o‘z ta’ziyalarini bildirdi.
Jumanazar Bazarbayev 1933-yil 13-noyabrda Mo‘ynoq tumanida tug‘ilgan. Olim 1955-yili Qoraqalpoq davlat pedagogika institutini tugatib, mehnat faoliyatini ushbu dargohda katta o‘qituvchi sifatida boshlagan. Keyinchalik Toshkent davlat universiteti (hozirgi Mirzo Ulug‘bek nomidagi O‘zbekiston Milliy universiteti) aspiranturasida tahsil olgan. Dastlab nomzodlik, so‘ngra doktorlik dissertatsiyasini himoya qildi.
Ilm-fan sohasidagi ko‘p yillik xizmatlari uchun 2000-yilda O‘zbekiston Fanlar akademiyasining akademigi etib saylandi.
Iste’dodli olim 60 yildan ortiq ilmiy-pedagogik faoliyati davomida O‘zbekiston Fanlar akademiyasi Qoraqalpog‘iston bo‘limining Tarix, til va adabiyot instituti direktorining ilmiy ishlar bo‘yicha o‘rinbosari, bo‘lim boshlig‘i, Nukus davlat universiteti (hozirgi Berdaq nomidagi Qoraqalpoq davlat universiteti) falsafa kafedrasining mudiri, Qoraqalpog‘iston Respublikasi xalq ta’limi vaziri, Ajiniyoz nomidagi Nukus davlat pedagogika institutining rektori, kafedra mudiri kabi lavozimlarda mehnat qilgan.
Jumanazar Bazarbayev 1990–1995-yillarda Qoraqalpog‘iston Respublikasi Jo‘qorg‘i Kengesi deputati sifatida faoliyat ko‘rsatgan.
Akademikning nima sababdan vafot etgani ma’lum qilinmagan.
Avvalroq O‘zbekiston Fanlar akademiyasi akademigi Telman Rajabov 85 yoshda, akademik Zokirjon Kanokov 64 yoshda, akademik Sattor Tursunmuhammedov 91 yoshda va professor Sobirjon Aminov 82 yoshda vafot etgani haqida xabar berilgan edi.
Izoh (0)