O‘zbekistonda mart oyidan beri 640 mingga yaqin karantin qoidalarini buzish holatlari aniqlangan

Maxsus komissiyaning 2020-yil 17-sentabr kunidagi qaroriga asosan karantin talablarini bosqichma-bosqich yumshatish bilan bir qatorda, jamoat joylari, jamoat transportida ijtimoiy masofa saqlash, tibbiy niqob taqish, to‘y va boshqa oilaviy marosimlarni o‘tkazish bo‘yicha belgilangan cheklovlar saqlanib qolgan. Lekin infeksiya tarqalishida asosan fuqarolarning karantin talablariga rioya qilmayotganligi sabab bo‘lmoqda, deb xabar bermoqda O‘zA.

Qayd etilishicha, karantin cheklovlari yumshatilishi munosabati bilan ayrim fuqarolarning mavjud karantin cheklovlari hamda sanitariya-epidemiologik talablarga rioya etmayotganligi, jamoat joylari, jamoat transportida ijtimoiy masofa saqlamayotganligi, tibbiy niqob taqmasdan harakatlanayotganliklari aniqlangan.

Shuningdek, to‘y va boshqa oilaviy marosimlarni o‘tkazish talabi va tartibi buzilayotganligi ham aholi o‘rtasida koronavirus infeksiyasi tarqalishi holatlarining keskin oshishiga sabab bo‘lmoqda.

Maxsus komissiya tomonidan belgilangan karantin qoidalariga rioya qilinishini nazorat qilish ichki ishlar idoralari va Milliy gvardiya xodimlariga yuklatilgan bo‘lib, 2020-yilning mart oyidan ayni paytga qadar 638 ming 859 ta huquqbuzarlik aniqlangan bo‘lib, shundan 571 ming 264 tasi erkaklar va 67 ming 595 tasi ayollar tomonidan sodir etilgan.

Huquqbuzarliklarning sodir etilish usuli bo‘yicha tahlil qilinganda 618 ming 801 ta holatda tibbiy niqob taqmasdan yurish, 20 ming 58 ta belgilangan karantin cheklovlariga amal qilmaslik bo‘yicha huquqbuzarliklar aniqlangan. Shundan, 521 ta vaqtinchalik to‘xtatilgan savdo faoliyatini davom ettirish, 497 ta karantin hududini tashlab ketish, 213 ta to‘y va marosim o‘tkazish qoidalarini buzish, 14 ta ijtimoiy tarmoqlarda vahima keltirib chiqaruvchi asossiz ma’lumotlarni tarqatish kabi huquqbuzarliklar aniqlangan.

Avvalroq O‘zbekistonda 15-sentabrgacha 619 126 nafar fuqaro karantin qoidalarini buzgani ma’lum qilingandi. Yuqoridagi xabardan ko‘rinib turibdiki, mamlakatda deyarli 10 kun ichida 20 mingga yaqin qoidabuzarlik qayd etilgan.