O‘zbekistonda o‘qituvchilarning koronavirusga chalinish statistikasi yashirilyaptimi? Nurmat Otabekov javob berdi

O‘qituvchilarning koronavirus bilan kasallanish holatlari qayd etilgan alohida raqamlar umumiy statistikada ajratib ko‘rsatilmaydi. Bu haqda AOKA huzuridagi shtabda o‘tkazilgan brifingda Respublika maxsus komissiyasi va Koronavirusga qarshi kurash shtabi a’zosi Nurmat Otabekov ma’lum qilgan.

Jumladan, mutaxassis “O‘qituvchilarda COVID-19 aniqlandi, degan xabarlar tarqalmoqda. Nimaga statistikada ko‘rsatilmayapti? Samarqand viloyatining Payariq, Jomboy tumanlarida 100 yaqin o‘qituvchilarda virus aniqlandi, deb xabar berishdi. Buxoroda qanchadan qancha o‘qituvchilarda aniqlandi, deb yozishmoqda, lekin nima uchun statistikada ular ko‘rsatilmayapti?”, degan savolga aniqlik kiritib o‘tgan.

Statistik raqamlar shakllanishiga e’tibor beradigan bo‘lsak, laboratoriya usulida tekshirilib, musbat natija olinganlarning barchasi inobatga olinadi. Statistik raqamlar bir kunda uch marta yangilanib, e’tiboringizga havola qilinyapti. Biz ularning orasida o‘qituvchilarni alohida toifalarga (kasb bilan bog‘liq) ajratib raqamlarda ko‘rsatmayapmiz. Bu amaliyot boshqa soha vakillariga ham bir xil ta’sir qiladi. Koronavirus bo‘yicha bemorlar haqidagi umumiy ma’lumotni e’tiboringizga havola qilyapmiz. Bularning birortasini statistik ma’lumotlarga kiritmaslikdan hech qanday manfaat yo‘q.

Nurmat Otabekov, Respublika maxsus komissiyasi va Koronavirusga qarshi kurash shtabi a’zosi

Aytish kerakki, O‘zbekistonda pandemiya sharoitida o‘qituvchi va o‘quvchilarning sog‘lig‘ini himoya qilish maqsadida maktab o‘qituvchilaridan ommaviy ravishda COVID-19’ga test olinishi yo‘lga qo‘yilgan, shu vaqtgacha Payariqda 60 nafar, Samarqand viloyatining Jomboy tumanida 40 nafar, Andijon, Jizzax va Samarqand viloyatlaridagi o‘nlab, Buxoro viloyatida 239 nafar, Qashqadaryoda 855 nafar o‘qituvchilarda koronavirus aniqlangani haqida xabar berildi.