Prezidentning “Bo‘stonliq tumanida boshqaruvning alohida tartibini joriy etish orqali turizmni jadal rivojlantirish chora-tadbirlari to‘g‘risida”gi 2020-yil 27-avgustdagi farmoniga muvofiq “Amirsoy” tog‘-chang‘i kurorti majmuasini kengaytirish bo‘yicha loyihaning 2-bosqichini amalga oshirish yuzasidan vazifa belgilangan, deya xabar bermoqda “Kun.uz”.
Shu maqsadda, loyiha tashabbuskori hamda u tomonidan jalb etilgan xalqaro moliya institutlari mablag‘lari hisobidan umumiy qiymati 75 million yevro bo‘lgan “Amirsoy” tog‘-chang‘i kurort majmuasi barpo etilishining 2-bosqichi to‘g‘risida hukumat qarori qabul qilindi.
Loyiha doirasida quyidagilarni amalga oshirish belgilandi:
- 2400 o‘ringa mo‘ljallangan to‘rtta restoran;
- 105 o‘rinli xonalar fondiga ega bo‘lgan “4 yulduzli” mehmonxona;
- 101 o‘rinli xonalar fondiga ega bo‘lgan “5 yulduzli” mehmonxona;
- ofislar va savdo maydonlaridan iborat 500 o‘ringa mo‘ljallangan ko‘p qavatli avtoturargoh;
- osma yo‘llar, tog‘-chang‘i ko‘targichlar, shuningdek, 16,8 km uzunlikdagi tog‘-chang‘i trassalari;
- tog‘ sporti, chang‘i va boshqa jihozlarni ijaraga berish shoxobchalariga ega bo‘lgan ko‘p tarmoqli markaz;
- basseynlar va hordiq chiqarish hamda dam olishning mavsumiy turlarini tashkil qilish uchun maxsus maydonlar.
Shuningdek, loyiha tashabbuskoriga qurilish-montaj ishlari va kelgusida loyihani ekspluatatsiya qilish jarayonida noyob tabiiy obyektlar va majmualarni, o‘simliklar va hayvonlarning genetik fondini saqlash, faoliyatning atrof-muhitga salbiy ta’sirining oldini olish va tabiatni muhofaza qilishga oid qonun hujjatlari talablariga qat’iy rioya qilish bo‘yicha mas’uliyat yuklatildi.
Ma'lumot uchun, “Amirsoy” tog‘-chang‘i kurorti majmuasi 21-dekabr kuni Toshkent viloyati Bo‘stonliq tumanida ochilgan.
Eslatib o‘tamiz, Shavkat Mirziyoyev 2019-yilning 1-iyun kuni Toshkent viloyatiga tashrifi chog‘ida “Chorvoq” erkin turistik zonasida xalqaro dam olish maskanlari, Bildirsoy, Chimyon va Nanay hududlarida Fransiya kompaniyalari konsorsiumi ishtirokida tog‘-chang‘i kurorti barpo etish loyihalari bilan tanishgandi. Shu yilning 14-avgust kuni Bo‘stonliq tumanida turizm salohiyatini kengaytirishga doir loyihalar taqdimoti bilan tanishgan Prezident tumanda “Bildirsoy—Chimyon—Nanay” xalqaro kurorti tashkil etilishini ma’lum qilgan.
Izoh (0)