Ijtimoiy tarmoqlarda Buxoro viloyati G‘ijduvon tumani xalq ta’limi bo‘limi mudirasiga nisbat berilgan audioyozuv tarqaldi, deb xabar bermoqda “Sof.uz”. Unda mudiraning maktab direktorlariga tahdid qilib, bolalarni masjiddan qaytarishga chaqirgani aytilgan.
“Barcha direktorlarga! O‘zingizning hududingizda masjidlar, juma namozi o‘qiladigan joylar bor. Barchangizning ma’naviyatchingiz ertalabdan buvingiznikiga qarab emas, o‘sha masjidlar oldida bo‘ladi. Agar masjidlarda birorta o‘quvchingizni ko‘radigan bo‘lsam, birortangizni kechirmayman. Siz pedagogsiz, siz uni o‘qituvchisisiz, chiroyli yo‘naltirib, to‘g‘ri tarbiyalab o‘sha yergacha bormaslik chorasini ko‘rishingiz kerak. U yerga borgandan keyin qaytara olmaysiz. Har biringizni shaxsan ogohlantirdim”, — deb aytilgan audioyozuvda.
Yaqinda Ichki ishlar vazirligi maxsus bayonot berib, O‘zbekistonda masjidlarga voyaga yetmagan fuqarolar va bolalarning o‘z ota, aka-uka va yaqin qarindoshlari hamrohligida namoz o‘qish uchun erkin kelib-ketishlari mumkinligini eslatib, bunga qonunchilikda hech qanday taqiq mavjud emasligini alohida ta’kidlagan edi.
Buxoro viloyat xalq ta’limi boshqarmasi tarqalgan ushbu audioyozuv bo‘yicha munosabat bildirdi.
“Tuman mudirasi tomonidan pandemiya davrida an’anaviy shakldagi faoliyatga o‘tgan va o‘tishi rejalashtirilgan maktablar o‘quvchilarining salomatligini asrash, ularning xavfsizligini ta’minlash, odamlar gavjum bo‘lgan joylarda yurishlarining oldini olish, qolaversa, o‘quvchilarning masjidga otasi, bobosi va yoshi katta yaqin qarindoshi bilan borishi, yolg‘iz bormasligiga chaqirish maqsadida voyaga yetmagan o‘quvchi-yoshlarning salomatligini o‘ylagan holda bunday ko‘rsatma berganligi aniqlandi.
Uning bu xatti-harakatlarida mamlakatimizda belgilangan diniy erkinlik huquqlariga to‘sqinlik qilish maqsadi yo‘q, bu faqat o‘quvchi-yoshlar xavfsizligini ta’minlash uchun qilingan ehtiyotkorlik chorasi xolos”, deyiladi Buxoro viloyat xalq ta’limi boshqarmasi munosabatida.
Izoh (0)