Ижтимоий тармоқларда Бухоро вилояти Ғиждувон тумани халқ таълими бўлими мудирасига нисбат берилган аудиоёзув тарқалди, деб хабар бермоқда «Sof.uz». Унда мудиранинг мактаб директорларига таҳдид қилиб, болаларни масжиддан қайтаришга чақиргани айтилган.
«Барча директорларга! Ўзингизнинг ҳудудингизда масжидлар, жума намози ўқиладиган жойлар бор. Барчангизнинг маънавиятчингиз эрталабдан бувингизникига қараб эмас, ўша масжидлар олдида бўлади. Агар масжидларда бирорта ўқувчингизни кўрадиган бўлсам, бирортангизни кечирмайман. Сиз педагогсиз, сиз уни ўқитувчисисиз, чиройли йўналтириб, тўғри тарбиялаб ўша ергача бормаслик чорасини кўришингиз керак. У ерга боргандан кейин қайтара олмайсиз. Ҳар бирингизни шахсан огоҳлантирдим», — деб айтилган аудиоёзувда.
Яқинда Ички ишлар вазирлиги махсус баёнот бериб, Ўзбекистонда масжидларга вояга етмаган фуқаролар ва болаларнинг ўз ота, ака-ука ва яқин қариндошлари ҳамроҳлигида намоз ўқиш учун эркин келиб-кетишлари мумкинлигини эслатиб, бунга қонунчиликда ҳеч қандай тақиқ мавжуд эмаслигини алоҳида таъкидлаган эди.
Бухоро вилоят халқ таълими бошқармаси тарқалган ушбу аудиоёзув бўйича муносабат билдирди.
«Туман мудираси томонидан пандемия даврида анъанавий шаклдаги фаолиятга ўтган ва ўтиши режалаштирилган мактаблар ўқувчиларининг саломатлигини асраш, уларнинг хавфсизлигини таъминлаш, одамлар гавжум бўлган жойларда юришларининг олдини олиш, қолаверса, ўқувчиларнинг масжидга отаси, бобоси ва ёши катта яқин қариндоши билан бориши, ёлғиз бормаслигига чақириш мақсадида вояга етмаган ўқувчи-ёшларнинг саломатлигини ўйлаган ҳолда бундай кўрсатма берганлиги аниқланди.
Унинг бу хатти-ҳаракатларида мамлакатимизда белгиланган диний эркинлик ҳуқуқларига тўсқинлик қилиш мақсади йўқ, бу фақат ўқувчи-ёшлар хавфсизлигини таъминлаш учун қилинган эҳтиёткорлик чораси холос», дейилади Бухоро вилоят халқ таълими бошқармаси муносабатида.
Изоҳ (0)