Tailandda qoyaga ko‘tarilish taqiqlanganiga qaramay, sharshara yonida suratga tushish uchun balandlikka ko‘tarilgan O‘zbekiston fuqarosi halok bo‘ldi. Bu haqda mahalliy Hilight Kapook nashri xabar berdi.
Ma’lumotlarga ko‘ra, 22 yoshli Abdulloh Soipov ismli O‘zbekiston fuqarosi Tailand janubidagi sharshara yonida tik jarlikdan qulab vafot etdi.
Jabrlanuvchining do‘stlari zudlik bilan qutqaruvchilar va shifokorlar guruhini chaqirgan, ammo yigit bosh qismidan olgan og‘ir jarohat tufayli vafot etgan.
Marhumning pasporti tekshirilgandan so‘ng, u Pxuketdagi Pranta Xanvi fondida ko‘ngilli sifatida faoliyat yuritgani va 2020-yil 25-noyabrgacha amal qiladigan tegishli vizaga ega bo‘lgani aniqlangan. Ayni paytda uning hamkasblari va do‘stlari politsiya tomonidan so‘roq qilinmoqda. Marhumning jasadi o‘limning haqiqiy sababini aniqlash uchun Ranong kasalxonasiga yuborilgan.
“Voqea to‘g‘risida Tailanddagi O‘zbekiston elchixonasiga xabar berilgan”, — deb yozadi nashr.
Eslatib o‘tamiz, 2020-yilning yanvar oyi boshlarida Germaniyada O‘zbekiston fuqarosi balandlikdan qulab, halok bo‘lgan edi.
Ma’lumot uchun, 2019-yilda jami 680 nafar O‘zbekiston fuqarosi chet elda vafot etgan, shundan 308 nafarining jasadi O‘zbekistonga xatlangan.
Izoh (0)