Таиландда қояга кўтарилиш тақиқланганига қарамай, шаршара ёнида суратга тушиш учун баландликка кўтарилган Ўзбекистон фуқароси ҳалок бўлди. Бу ҳақда маҳаллий Hilight Kapook нашри хабар берди.
Маълумотларга кўра, 22 ёшли Абдуллоҳ Соипов исмли Ўзбекистон фуқароси Таиланд жанубидаги шаршара ёнида тик жарликдан қулаб вафот этди.
Жабрланувчининг дўстлари зудлик билан қутқарувчилар ва шифокорлар гуруҳини чақирган, аммо йигит бош қисмидан олган оғир жароҳат туфайли вафот этган.
Марҳумнинг паспорти текширилгандан сўнг, у Пхукетдаги Пранта Ханви фондида кўнгилли сифатида фаолият юритгани ва 2020 йил 25 ноябргача амал қиладиган тегишли визага эга бўлгани аниқланган. Айни пайтда унинг ҳамкасблари ва дўстлари полиция томонидан сўроқ қилинмоқда. Марҳумнинг жасади ўлимнинг ҳақиқий сабабини аниқлаш учун Ранонг касалхонасига юборилган.
«Воқеа тўғрисида Таиланддаги Ўзбекистон элчихонасига хабар берилган», — деб ёзади нашр.
Эслатиб ўтамиз, 2020 йилнинг январь ойи бошларида Германияда Ўзбекистон фуқароси баландликдан қулаб, ҳалок бўлган эди.
Маълумот учун, 2019 йилда жами 680 нафар Ўзбекистон фуқароси чет элда вафот этган, шундан 308 нафарининг жасади Ўзбекистонга хатланган.
Изоҳ (0)