“O‘zbekiston Respublikasida chet el fuqarolari va fuqaroligi bo‘lmagan shaxslarning huquqiy maqomi to‘g‘risida”gi qonun loyihasi ishlab chiqildi. IIV Migratsiya va fuqarolikni rasmiylashtirish bosh boshqarmasi bo‘lim boshlig‘i Dilshod Murodbekov 3-sentabr kuni matbuot anjumanida bu boradagi yangiliklarni sanab o‘tdi, deya xabar beradi “Kun.uz”
“Avvalgi tartib-qoidaga ko‘ra, chet el fuqarosi O‘zbekistonga kirib kelgach, ichki ishlar idoralarida ro‘yxatdan o‘tish uchun migratsiya va fuqarolikni rasmiylashtirish xizmatlariga borish majburiyatlari bor edi. Hozirgi kunda ushbu majburiyatlar bekor qilinib, ularni vaqtincha ro‘yxatdan o‘tkazish elektron tizim orqali amalga oshirilmoqda”, – dedi Dilshod Murodbekov.
Qayd etilishicha, yangi qonun loyihasida investorlar uchun vaqtinchalik beriladigan guvohnoma shartlari ham belgilangan. O‘zbekistonga 3 million AQSh dollari miqdorida investitsiya kiritgan chet el fuqarolariga 10 yillik muddatda yashash guvohnomasi beriladi. Bu tartib 2021-yil 1-yanvardan boshlab kuchga kirishi rejalashtirilyapti.
Faxriy fuqaro maqomini olgan, ya’ni 1 million 200 ming dollardan oshiq investitsiya kiritgan fuqarolarga ham yashash guvohnomasini berish tizimi joriy qilingan.
Qonun qabul qilinishi bilan chet el fuqarolarining O‘zbekiston hududida erkin harakatlanishi osonlashtiriladi. Oldin chet el fuqarolari bir joydan vaqtinchalik ro‘yxatdan o‘tganidan keyin faqat o‘sha yerda yashash majburiyati belgilab berilgandi. Endi esa chet el fuqarosi boshqa hududda yashash istagini bildirsa, oldingi ro‘yxatdan o‘tgan joyi bekor qilinmasdan, vaqtinchalik boshqa hududda ro‘yxatdan o‘tib, yashash imkoniyati berilmoqda.
“Qonun loyihasidagi yana bir afzalliklardan biri – chet el fuqarolarining O‘zbekistonga kirishi yoki ketishiga ruxsat berishda ortiqcha ovoragarchilik bo‘lmaydi”, – dedi Dilshod Murodbekov.
Ma’lum qilinishicha, chet el fuqarosi betob bo‘lib yoki baxtsiz hodisa tufayli O‘zbekistondan belgilangan muddatda chiqib ketolmasa, ularga ortiqcha hujjatlar taqdim etmay, qo‘shimcha davlat boji to‘lamay, respublikadan chiqib ketishlariga imkoniyat yaratib beriladi.
Mavzuga doir:
- Oliy Majlis quyi palatasi fuqarolik to‘g‘risidagi qonunning yangi tahririni qabul qildi. U 50 ming vatandoshni O‘zbekiston fuqarosiga aylantiradi
- Fuqarolik olishda o‘zbek tilini muloqot darajasida bilish shart qilib belgilanishi mumkin
- O‘zbekiston fuqaroligiga oid masalalarni ko‘rib chiqish tartibi ma’lum qilindi
Izoh (0)