Turkiyaning amaldagi prezidenti Rajab Toyyib Erdo‘g‘onning rafiqasi Emine Erdo‘g‘on prezident qarorgohida hind aktyori Amir Xonni qabul qildi. Bu haqda India TVnews nashri xabar beradi.
Mazkur uchrashuv Hindistonning qurg‘oqchilikdan aziyat chekkan hudud aholisiga suv yetkazib berishga asoslangan ijtimoiy loyihasidan xabardor etgan aktyor tashabbusiga binoan tashkil qilingan.
Uchrashuvda Amir Xon Emine Erdo‘g‘onning muhim ijtimoiy loyihalar hamda insonparvarlik yordamini amalga oshirishda faol ekanini ta’kidlagan. Emine esa o‘z navbatida filmlarida ijtimoiy muammolarni aks ettirayotgani uchun Amir Xonga minnatdorchilik bildirgan, deyiladi xabarda.
“Hind kinosining dunyoga mashhur aktyori, rejissor Amir Xon bilan Huber ko‘shkida suhbat qurdik. Uning Laal Singh Chaddha nomli so‘nggi filmining qolgan suratga olish ishlarini Turkiyada davom ettirishidan mamnun bo‘ldim”, — degan birinchi xonim Instagram sahifasida.
Shuningdek, Emine aktyor filmlarda bolalarning shaxsiy qobiliyatlariga mos ravishda tarbiyalash va imkoniyati cheklangan bolalar haqidagi mavzularni ko‘tarishini e’tirof etib, yangi filmni intizorlik bilan kutishini ta’kidlagan.
Izoh (0)