AQSh va Kanada olimlari koronavirus infeksiyasini nur terapiyasi bilan davolash mumkin degan fikrda. Rossiyalik mutaxassislar esa bu usulning xavfsiz ekaniga shubha bildirmoqda.
Kanadadagi Jyek Adi onkologiya markazi tibbiy fizika bo‘limi mutaxassislarining ta’kidlashicha, kichik dozadagi rentgen nurlari koronavirus infeksiyasining asorati hisoblanuvchi pnevmoniyaga qarshi yordam berishi mumkin. “XX asr boshida pnevmoniyani rentgen nurlari bilan davolash oddiy hol bo‘lgan”, — degan tadqiqot mualliflari.
Qayd etilishicha, ilmiy tadqiqotlar nurlanishning kichik dozalari yallig‘lanishga qarshi samaraga egaligini ko‘rsatgan. Mutaxassislarning fikricha, nur terapiyani qo‘llash koronavirusdan o‘lim darajasini kamaytirishi, radiatsiyaning kichik dozalarda qo‘llanishi esa odatda bunday davolashda yuzaga keladigan nojo‘ya toksikologik ta’sirlarning oldini olishga yordam beradi.
AQShdagi Emori universitetining Saraton tadqiqotlari instituti ilmiy guruhi koronavirus infeksiyasi va pnevmoniyaga chalingan bemorlarda nur terapiyani sinab ko‘rgan. Tadqiqot doirasida 10 bemor o‘pkasi kichik dozalarda nurlantirilgan. Yana 10 bemor nur terapiyasiz davolangan. Natijada nurlangan bemorlar 3 kunda, oddiy usulda davolanganlar esa 12 kunda sog‘aygan. Tadqiqot mualliflari nur terapiya bemorlarga toksik ta’sir qilmaganini ta’kidlagan.
O‘z navbatida Rossiyaning N.N.Bloxin nomidagi onkologiya ilmiy-tadqiqot markazi yetakchi ilmiy xodimi Irina Lebedenkoning bildirishicha, koronavirusdan radiatsiya bilan davolash yetarlicha tadqiq qilinmagan. U nurlanishning kichik dozalari ham saraton keltirib chiqarishini eslatib o‘tgan va infeksiyaga qarshi kurashishning boshqa xavfsiz usullarini izlashga chaqirgan.
Avvalroq AQSh prezidenti Donald Tramp koronavirusni quyosh nuri bilan davolashni taklif qilgandi. Bir necha shifokorlar CNN’ga quyosh nuri koronavirus uchun davolash vositasi bo‘lolmasligini bildirgan. Shifokorlar Trampning quyosh nuri bilan davolanish haqidagi taklifi mantiqqa to‘g‘ri kelmasligi haqida ogohlantirgan. Quyosh nurida davolanishga urinish kuyish, teri saratoni yoki boshqa salbiy oqibatlarga olib kelishi mumkin.
Eslatib o‘tamiz, virusga qarshi dori vositalarini testdan o‘tkazish jarayonida faqatgina “Remdesivir” COVID-19’ga qarshi umid uyg‘otuvchi natjalarni ko‘rsatgan. Rossiyada koronavirusga qarshi dunyoda birinchi vaksina ro‘yxatga olindi. Putin uning samarali ekanligini ta’kidlagan. Roszdravnadzor rahbari o‘rinbosari Valentina Kosenko ushbu vaksina bilan bir necha yuzlab ko‘ngillilar emlangani va ularda vaksinaga nisbatan jiddiy nojo‘ya ta’sirlar kuzatilmaganini bildirgan. Biroq Rossiyaning “Fontanka” nashri ushbu vaksinasi to‘g‘risidagi Gamaleya markazining hisoboti bilan tanishib chiqib “U Putin aytganidek umidliga o‘xshamayapti”, degan xulosaga kelgan.
Izoh (0)