АҚШ ва Канада олимлари коронавирус инфекциясини нур терапияси билан даволаш мумкин деган фикрда. Россиялик мутахассислар эса бу усулнинг хавфсиз эканига шубҳа билдирмоқда.
Канададаги Жек Ади онкология маркази тиббий физика бўлими мутахассисларининг таъкидлашича, кичик дозадаги рентген нурлари коронавирус инфекциясининг асорати ҳисобланувчи пневмонияга қарши ёрдам бериши мумкин. «ХХ аср бошида пневмонияни рентген нурлари билан даволаш оддий ҳол бўлган», — деган тадқиқот муаллифлари.
Қайд этилишича, илмий тадқиқотлар нурланишнинг кичик дозалари яллиғланишга қарши самарага эгалигини кўрсатган. Мутахассисларнинг фикрича, нур терапияни қўллаш коронавирусдан ўлим даражасини камайтириши, радиациянинг кичик дозаларда қўлланиши эса одатда бундай даволашда юзага келадиган ножўя токсикологик таъсирларнинг олдини олишга ёрдам беради.
АҚШдаги Эмори университетининг Саратон тадқиқотлари институти илмий гуруҳи коронавирус инфекцияси ва пневмонияга чалинган беморларда нур терапияни синаб кўрган. Тадқиқот доирасида 10 бемор ўпкаси кичик дозаларда нурлантирилган. Яна 10 бемор нур терапиясиз даволанган. Натижада нурланган беморлар 3 кунда, оддий усулда даволанганлар эса 12 кунда соғайган. Тадқиқот муаллифлари нур терапия беморларга токсик таъсир қилмаганини таъкидлаган.
Ўз навбатида Россиянинг Н.Н.Блохин номидаги онкология илмий-тадқиқот маркази етакчи илмий ходими Ирина Лебеденконинг билдиришича, коронавирусдан радиация билан даволаш етарлича тадқиқ қилинмаган. У нурланишнинг кичик дозалари ҳам саратон келтириб чиқаришини эслатиб ўтган ва инфекцияга қарши курашишнинг бошқа хавфсиз усулларини излашга чақирган.
Аввалроқ АҚШ президенти Дональд Трамп коронавирусни қуёш нури билан даволашни таклиф қилганди. Бир неча шифокорлар CNN’га қуёш нури коронавирус учун даволаш воситаси бўлолмаслигини билдирган. Шифокорлар Трампнинг қуёш нури билан даволаниш ҳақидаги таклифи мантиққа тўғри келмаслиги ҳақида огоҳлантирган. Қуёш нурида даволанишга уриниш куйиш, тери саратони ёки бошқа салбий оқибатларга олиб келиши мумкин.
Эслатиб ўтамиз, вирусга қарши дори воситаларини тестдан ўтказиш жараёнида фақатгина «Ремдесивир» COVID-19’га қарши умид уйғотувчи натжаларни кўрсатган. Россияда коронавирусга қарши дунёда биринчи вакцина рўйхатга олинди. Путин унинг самарали эканлигини таъкидлаган. Росздравнадзор раҳбари ўринбосари Валентина Косенко ушбу вакцина билан бир неча юзлаб кўнгиллилар эмлангани ва уларда вакцинага нисбатан жиддий ножўя таъсирлар кузатилмаганини билдирган. Бироқ Россиянинг «Фонтанка» нашри ушбу вакцинаси тўғрисидаги Гамалея марказининг ҳисоботи билан танишиб чиқиб «У Путин айтганидек умидлига ўхшамаяпти», деган хулосага келган.
Изоҳ (0)