“Manchester Siti” Angliya chempionatining yangi mavsumi oldidan tarkibni kuchaytirishga jiddiy e’tibor qaratmoqchi.
Sky Sports nashrining xabar qilishicha, “Valensiya”dan sotib olingan Ferran Torres va “Bornmut”dan olib kelingan Natan Akedan tashqari “shaharliklar” yana besh nafar yangi futbolchi sotib olmoqchi.
“Manchester Siti”ning asosiy maqsadi markaziy va qanot himoyachilari sotib olish, shuningdek, jamoani tark etayotgan David Silva va iyunda 32 yoshni qarshilagan Serxio Agueroga o‘rinbosar topish hisoblanadi.
Ingliz klubining asosiy maqsadi “Inter” hujumchisi Lautaro Martines bo‘lib turibdi. Shuningdek, “Manchester Siti” “Atletiko”ga Joau Feliks transferi borasida ham so‘rov yuborgan. Jamoa markaziy himoyani “Napoli” yetakchisi Kalidu Kulibali bilan to‘ldirmoqchi.
Avvalroq “Manchester Siti” rahbariyati tarkibni kuchaytirish uchun Pep Gvardiolaga 300 million yevro ajratishi xabar qilingandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)