Germaniya poytaxti Berlin shahrida 2020-yil 1-avgust kuni koronavirus infeksiyasining tarqalishiga qarshi ko‘rilgan karantin cheklovlariga nisbatan norozilik namoyishlari o‘tkazildi. Noroziliklar tunga qadar davom etdi va ularda namoyishchilar hamda politsiya xodimlari o‘rtasida to‘qnashuvlar kuzatildi. Bu haqda Meduza xabar qilgan.
Berlin politasiyasi ma’lumotiga ko‘ra, 2-avgust kunning birinchi yarmida kuzatilgan to‘qnashuvlar oqibatida 45 nafar politsiyachi talafot ko‘rgan. Namoyishlarda xavfsizlikni ta’minlashga jami 1,1 ming nafar politsiyachi jalb qilingan.
Norozilik bildirayotgan namoyishchilardan 133 nafari hibsga olingan, ularning 89 nafariga nisbatan jinoiy ish ochilgan, qolganlar ma’muriy jazoga tortilishi mumkin.
Koronavirus pandemiyasi sabab joriy qilingan cheklovlarga nisbatan norozilik namoyishlari 1-avgust kuni Unter-den-Liden bulvarida boshlangan. Politsiya ma’lumoti bo‘yicha norozilik namoyishlarida 17 ming nafarga yaqin odam ishtirok etgan. Ularning ko‘pchiligi ijtimoiy masofalanish qoidasiga rioya etmagan, tibbiy niqoblar taqmagan, endi Berlin politsiyasi tomonidan mazkur qoidabuzarliklarni sodir etganlarga nisbatan jazo choralari qo‘llanilishi mumkin.
DW nashrining yozishicha miting tashkilotchilari orasida Shtutgartdagi ‘Querdenken 711’ guruhi vakillari ham bo‘lgan. Ushbu guruh a’zolari orasida fitna nazariyasi tarafdorlari, o‘ng ekstremistlar va kovid-dissidentlar kiradi. Shuningdek, turli neonatsist guruhlari ham odamlarni namoyishda ishtirok etishga chaqirgan.
Birinchi aksiyasi nihoyasiga yetganidan keyin “Ozodlik kuni – pandemiya tugasin” deb nomlangan navbatdagi namoyish boshlandi. Qariyb 20 ming nafarga yetgan aksiya ishtirokchilari ham tibbiy niqob taqmagan ijtimoiy masofalanish qoidasiga amal qilmagan. Politsiya bir nechta ogohlantirishlardan keyin tadbir yakunlanganini e’lon qildi, namoyish o‘tkazishda davom etgan odamlar kuch ishlatib maydondan chetlashtirilgan.
Namoyishchilar Berlin markazida yana bir nechta tadbir o‘tkazishga uringan va ularda ham minglab odamlar ishtirok etgan. Ushbu aksiya ishtirokchilari ham karantin tartib-qoidalariga rioya qilmagan, deyiladi Berlin politsiyasining bayonotida. Huquq-tartibot xodimlari odamlarni tarqatish uchun kuch ishlatishiga to‘g‘ri kelgan.
Mavzuga doir: Germaniyalik olimlar koronavirus tarqalishini kuzatish uchun ommaviy konsert uyushtiradi
Germaniyada COVID-19 koronavirus infeksiyasining keng tarqalishiga qarshi kurashish maqsadida mart va aprel oylarida qat’iy karantin choralari qo‘llanilgan. Karantin tufayli mamlakatdagi iqtisodiy ko‘rsatkichlar keskin yomonlashgan.
Aprel o‘rtalariga borib cheklovlar asta-sekin bekor qilina boshlandi, ammo ayrim qoidalar avgust boshiga kelib ham amalda bo‘lib turibdi. Iyul oxirlarida Yevroittifoqning ko‘plab mamlakatlarida, xususan, Germaniyada koronavirus infeksiyasini yuqtirib olish bo‘yicha yangi holatlar soni ko‘paygan, bu koronavirus tarqalishining “ikkinchi to‘lqini” bo‘lishi mumkin va endi yana kuchli karantin tartibi o‘rnatilishi haqida taxminlar yangramoqda.
Izoh (0)