Германия пойтахти Берлин шаҳрида 2020 йил 1 август куни коронавирус инфекциясининг тарқалишига қарши кўрилган карантин чекловларига нисбатан норозилик намойишлари ўтказилди. Норозиликлар тунга қадар давом этди ва уларда намойишчилар ҳамда полиция ходимлари ўртасида тўқнашувлар кузатилди. Бу ҳақда Meduza хабар қилган.
Берлин политасияси маълумотига кўра, 2 август куннинг биринчи ярмида кузатилган тўқнашувлар оқибатида 45 нафар полициячи талафот кўрган. Намойишларда хавфсизликни таъминлашга жами 1,1 минг нафар полициячи жалб қилинган.
Норозилик билдираётган намойишчилардан 133 нафари ҳибсга олинган, уларнинг 89 нафарига нисбатан жиноий иш очилган, қолганлар маъмурий жазога тортилиши мумкин.
Коронавирус пандемияси сабаб жорий қилинган чекловларга нисбатан норозилик намойишлари 1 август куни Унтер-ден-Лиден булварида бошланган. Полиция маълумоти бўйича норозилик намойишларида 17 минг нафарга яқин одам иштирок этган. Уларнинг кўпчилиги ижтимоий масофаланиш қоидасига риоя этмаган, тиббий ниқоблар тақмаган, энди Берлин полицияси томонидан мазкур қоидабузарликларни содир этганларга нисбатан жазо чоралари қўлланилиши мумкин.
DW нашрининг ёзишича митинг ташкилотчилари орасида Штутгартдаги ‘Querdenken 711’ гуруҳи вакиллари ҳам бўлган. Ушбу гуруҳ аъзолари орасида фитна назарияси тарафдорлари, ўнг экстремистлар ва ковид-диссидентлар киради. Шунингдек, турли неонацист гуруҳлари ҳам одамларни намойишда иштирок этишга чақирган.
Биринчи акцияси ниҳоясига етганидан кейин «Озодлик куни – пандемия тугасин» деб номланган навбатдаги намойиш бошланди. Қарийб 20 минг нафарга етган акция иштирокчилари ҳам тиббий ниқоб тақмаган ижтимоий масофаланиш қоидасига амал қилмаган. Полиция бир нечта огоҳлантиришлардан кейин тадбир якунланганини эълон қилди, намойиш ўтказишда давом этган одамлар куч ишлатиб майдондан четлаштирилган.
Намойишчилар Берлин марказида яна бир нечта тадбир ўтказишга уринган ва уларда ҳам минглаб одамлар иштирок этган. Ушбу акция иштирокчилари ҳам карантин тартиб-қоидаларига риоя қилмаган, дейилади Берлин полициясининг баёнотида. Ҳуқуқ-тартибот ходимлари одамларни тарқатиш учун куч ишлатишига тўғри келган.
Ушбу намойишларнинг айнан қайси бирида Берлин политасиясининг 445 нафар ходимига талафот етганига ахборотда аниқлик киритилмаган.Германияда COVID-19 коронавирус инфекциясининг кенг тарқалишига қарши курашиш мақсадида март ва апрель ойларида қатъий карантин чоралари қўлланилган. Карантин туфайли мамлакатдаги иқтисодий кўрсаткичлар кескин ёмонлашган.
Апрель ўрталарига бориб чекловлар аста-секин бекор қилина бошланди, аммо айрим қоидалар август бошига келиб ҳам амалда бўлиб турибди. Июль охирларида Евроиттифоқнинг кўплаб мамлакатларида, хусусан, Германияда коронавирус инфекциясини юқтириб олиш бўйича янги ҳолатлар сони кўпайган, бу коронавирус тарқалишининг «иккинчи тўлқини» бўлиши мумкин ва энди яна кучли карантин тартиби ўрнатилиши ҳақида тахминлар янграмоқда.
Изоҳ (0)