Dunyoda yuzaga kelgan epidemiologik vaziyatni inobatga olib 52-Xalqaro kimyo olimpiadasi 25-iyul kuni masofaviy tarzda o‘tkazildi, deya xabar beradi Xalq ta’limi vazirligi.
Qayd etilishicha, kimyo fanidan eng nufuzli hisoblanadigan mazkur olimpiadada dunyoning 60 davlatidan jami 235 nafar iqtidorli o‘quvchi ishtirok etgan.
Olimpiadada O‘zbekiston sharafini 2018/2019-o‘quv yilida respublika fan olimpiadasida va qo‘shimcha respublika olimpiadasi g‘oliblari orasidan saralab olingan 4 nafar iqtidorli o‘quvchi himoya qilib, quyidagi natijalarni qayd etdi:- Mirumid Mirakbarov (Toshkent pediatriya tibbiyot instituti huzuridagi akademik litsey) – kumush medal;
- Dilshodaxon Isayeva (Toshkent pediatriya tibbiyot instituti huzuridagi akademik litsey) – kumush medal;
- Firdavs Sobirov (35-maktab, Buxoro shahri) – bronza medal;
- Akobir Narzullayev (49-maktab, Buxoro viloyati, Jondor tumani) – diplom.
Olimpiadada o‘quvchilar laboratoriya kimyoviy tajribalarisiz, faqat nazariy bosqichni o‘tkazishdi. Olimpiada sinov jarayonini nazoratchilar 4 ta vebkamera yordamida kuzatib borishdi.
Masofaviy olimpiada Toshkent pediatriya tibbiyot instituti huzuridagi akademik litseyda sanitariya gigiyena hamda karantin qoidalariga qat’iy rioya etgan holda tashkil etildi.
Ma’lumot uchun, 52-Xalqaro kimyo olimpiadasi Turkiyaning Istanbul shahrida o‘tkazilishi rejalashtirilgan edi. Ammo koronavirus pandemiyasi tufayli rejalar o‘zgartirilib, masofaviy o‘tkazildi. G‘oliblarning medallari va diplomlari Turkiyadagi tashkiliy qo‘mita tomonidan pochta orqali jo‘natiladi.
Mavzuga doir:
- Fan olimpiadalarida g‘olib bo‘lgan talabalarga qo‘shimcha imtiyozlar berilishi mumkin
- Matematika bo‘yicha xalqaro olimpiada g‘olibi munosib kutib olinadi. Buxoro viloyati xalq ta’limi boshqarmasi shunga ishontirmoqda
- Xalq ta’limi vazirligi o‘quv yilini boshlash bo‘yicha uchta ssenariy ustida ish olib borayotganini ma’lum qildi
Izoh (0)