Дунёда юзага келган эпидемиологик вазиятни инобатга олиб 52-Халқаро кимё олимпиадаси 25 июль куни масофавий тарзда ўтказилди, дея хабар беради Халқ таълими вазирлиги.
Қайд этилишича, кимё фанидан энг нуфузли ҳисобланадиган мазкур олимпиадада дунёнинг 60 давлатидан жами 235 нафар иқтидорли ўқувчи иштирок этган.
Олимпиадада Ўзбекистон шарафини 2018/2019-ўқув йилида республика фан олимпиадасида ва қўшимча республика олимпиадаси ғолиблари орасидан саралаб олинган 4 нафар иқтидорли ўқувчи ҳимоя қилиб, қуйидаги натижаларни қайд этди:- Мирумид Миракбаров (Тошкент педиатрия тиббиёт институти ҳузуридаги академик лицей) – кумуш медал;
- Дилшодахон Исаева (Тошкент педиатрия тиббиёт институти ҳузуридаги академик лицей) – кумуш медал;
- Фирдавс Собиров (35-мактаб, Бухоро шаҳри) – бронза медал;
- Акобир Нарзуллаев (49-мактаб, Бухоро вилояти, Жондор тумани) – диплом.
Олимпиадада ўқувчилар лаборатория кимёвий тажрибаларисиз, фақат назарий босқични ўтказишди. Олимпиада синов жараёнини назоратчилар 4 та вебкамера ёрдамида кузатиб боришди.
Масофавий олимпиада Тошкент педиатрия тиббиёт институти ҳузуридаги академик лицейда санитария гигиена ҳамда карантин қоидаларига қатъий риоя этган ҳолда ташкил этилди.
Маълумот учун, 52-Халқаро кимё олимпиадаси Туркиянинг Истанбул шаҳрида ўтказилиши режалаштирилган эди. Аммо коронавирус пандемияси туфайли режалар ўзгартирилиб, масофавий ўтказилди. Ғолибларнинг медаллари ва дипломлари Туркиядаги ташкилий қўмита томонидан почта орқали жўнатилади.
Мавзуга доир:
- Фан олимпиадаларида ғолиб бўлган талабаларга қўшимча имтиёзлар берилиши мумкин
- Математика бўйича халқаро олимпиада ғолиби муносиб кутиб олинади. Бухоро вилояти халқ таълими бошқармаси шунга ишонтирмоқда
- Халқ таълими вазирлиги ўқув йилини бошлаш бўйича учта сценарий устида иш олиб бораётганини маълум қилди
Изоҳ (0)