Qirg‘iz koloniyasida vafot etgan huquq himoyachisi Azimjon Asqarov O‘zbekiston hududida dafn etildi. Bu haqda “Fergana.ru” nashri xabar berdi.
Ta’kidlanishicha, dafn Toshkent viloyatining Yangibozor qishlog‘ida bo‘lib o‘tgan. Asqarov jasadi 31-iyul kuni mahalliy vaqt bilan soat 12:00 da O‘shdagi “Do‘stlik” chegara postidan olib o‘tilgan.
Mayyitni marhumning turmush o‘rtog‘i Hadicha Asqarova kuzatib borgan va chegaraning o‘zbek tomonida uni o‘g‘li kutib olgan. Azimjon Asqarov yaqinlariga ona yurtiga dafn qilishni vasiyat qilgandi. Bundan tashqari, Asqarovning qarindoshlari marhum Qirg‘izistonda dafn etilganida uning qabrini vandallar tinch qo‘ymasligidan xavotirda edi.
Umrbod qamoqqa hukm etilgan Asqarov 19-koloniyada jazo muddatini o‘tayotgandi. 20-iyul kuni jurnalistlar huquq himoyachisining qattiq kasallanganidan xabar topishgan. 22-iyul kuni koloniyaga tashrif buyurgan advokat Valerian Vaxitov Asqarovning o‘ta og‘ir ahvolda ekaniga guvoh bo‘lgan.
69 yoshga kirgan mahbusni suhbat xonasiga zo‘rg‘a qo‘ltiqlab olib kirishgan, Asqarov zo‘rg‘a nafas olar, doim yo‘talardi. “Bir dunyo” huquq himoyasi tashkiloti qirg‘iz hukumatidan kasal insonni zudlik bilan ozod qilishini so‘ragan, lekin hukumat bu iltimosni e’tiborsiz qoldirdi. 24-iyul kuni Asqarov kasalxonasi bor 47-koloniyaga olib o‘tildi. 25-iyul kuni esa olamdan o‘tdi.
Jasad tanasini yorib ko‘rish tekshiruvi mahbusning o‘limiga pnevmoniya kasalligi sabab bo‘lganini aniqladi. Qamoqxona ma’muriyati xodimlari na Asqarovni va na boshqa mahbuslarni koronavirus ko‘rigidan o‘tkazgan, hattoki buni lozim deb ham topmagan. Biroq Qirg‘iziston sog‘liqni saqlash vazirligi anchadan beri pnevmoniyadan o‘lgan odamlarni koronavirus ro‘yxatiga qo‘shib kelmoqda. Yoz fasliga xos bo‘lmagan pnevmoniya tarqalishini shifokorlar COVID-19 bilan bog‘lamoqda.
Azimjon Asqarov — Qirg‘izistondagi eng mashhur inson huquqlari himoyachilaridan biri bo‘lib, u 10 yildan buyon qamoqxonada edi. U 2010-yil 15-iyunda Qirg‘iziston janubidagi millatlararo ziddiyat tufayli ommaviy tartibsizliklarni tashkil qilganlik va militsiya xodimining o‘ldirilishida ishtirok etganlikda ayblanib, hibsga olingan. 15-sentabrda sud Asqarovni bir umrga ozodlikdan mahrum qilgan, biroq u o‘z aybini tan olmagandi.
BMTning inson huquqlari bo‘yicha qo‘mitasi Asqarovga nisbatan kuch ishlatilgani, zo‘ravonlik qilingani, inson huquqlari himoyachisiga nisbatan sud ishi adolatsiz tarzda ko‘rib chiqilganini qayd etgan. Inson huquqlari himoyachilari Asqarovga nisbatan jazoning bu qadar og‘ir bo‘lganini uning bevosita militsiya tomonidan fuqarolarga nisbatan qilingan zo‘ravonliklar yuzasidan jurnalistik surishtiruvlar o‘tkazgani va ularni fosh etgani bilan bog‘lagan, deb yozadi Kloop.kz.
2016-yilda BMTning inson huquqlari bo‘yicha qo‘mitasi Qirg‘iziston hukumatidan Asqarovga nisbatan qo‘llanilgan jazoni bekor qilish va uni garov evaziga ozod etishga chaqirgan, ammo ushbu masala ochiq qolgan edi.
Izoh (0)