O‘zbekistonda koronavirus pandemiyasiga qarshi kurashayotgan tibbiyot xodimlarining 540 nafardan ziyodi COVID-19’ga chalingan. Bu haqda 30-iyul kuni AOKAda bo‘lib o‘tgan matbuot anjumanida ma’lum qilindi, deya xabar bermoqda “Daryo” muxbiri Mirolim Isajonov.
Tadbirda jurnalistlardan birining “O‘zbekistonga COVID-19 kirib kelgan ilk paytlarda, koronavirusga qarshi kurash va karantin bo‘yicha Xitoy tajribasidan borilayotgani haqida ko‘p gapirildi. Keyinchalik, bu borada hech narsa deyilmay qo‘yildi. Ayni paytda qaysi davlat tajribasidan boryapmiz, qaysi mamlakatning karantin tadbirlari o‘rganilyapti?”, degan savolga Koronavirusga qarshi kurashish shtabi a’zosi Habibullo Oqilov shunday javob qaytardi:
“Biz bu to‘g‘risida juda ko‘p marotaba gapirdik. Videokonfrensaloqa yordamida eng rivojlangan mamlakatlardagi hamkasblarimiz bilan tizimli ravishda maslahatlashib, tajriba almashib turibmiz.
Shu o‘rinda bir narsani qayd etish kerakki, mart oyidan shu paytgacha o‘zbekistonlik shifokorlarlarning barchasi koronavirusga qarshi kurash va davolash bo‘yicha yetarli tajribaga ega bo‘ldi. Hozirgi vaziyatda tug‘ilayotgan savollarga barcha tibbiyot xodimlarining o‘zi javob berish va davolashga qodir. Hattoki, qo‘shni davlatlar ham bizning shifokorlarimiz bilan davolash standartlari yuzasidan maslahatlashyapti”, — dedi Oqilov.
Izoh (0)