Қорақалпоғистондаги «Makan.uz», «Kruz.uz» ва «Kar24.uz» нашрларининг бош муҳаррирлари «Repost.uz»нинг Қорақалпоғистон Жўқорғи Кенгеси раиси, Ўзбекистон Сенати раиси ўринбосари Муса Ерниязов вафот этгани (у ҳозирги вақтда коронавирусдан даволанмоқда) ҳақидаги хабарларини қайта чоп этганидан сўнг прокуратурага чақирилгани ҳақида хабар берилган эди. Ўзбекистон бош прокурорининг ўринбосари Светлана Ортиқова бу ҳолат бўйича қорақалпоғистонлик ҳамкасбларига танбеҳ берди. Бу ҳақда «Xabar.uz» маълум қилди.
Нашрнинг ёзишича, Светлана Ортиқова қорақалпоғистонлик журналистлар билан содир бўлган воқеага ўз муносабатини билдирган.
«Кеча шу масалада Қорақалпоғистон прокурори билан гаплашдим. Вазиятни муҳокама қилиш жараёнида ҳолат юзасидан суриштирув ўтказган ходимларнинг хатти-ҳаракатини оқлаб бўлмаслиги айтиб, уларга қаттиқ танбеҳ бердим. Қорақалпоғистонлик айрим ҳамкасбларим кечанинг ўзида маҳаллий журналистлардан узр сўраган», — дея маълум қилган бош прокурор ўринбосари.
Светлана Ортиқованинг сўзларига кўра, айни пайтда ўша ходимларнинг хатти-ҳаракатлари ўрганилмоқда, натижасига қараб тегишли чора кўрилади.
Шунингдек, Светлана Ортиқова нашрлар томонидан нотўғри ахборот тарқатганлик ҳолати «ёпилиб кетмаслигини» айтди. Ҳозирги кунда мазкур ҳолат юзасидан Қорақалпоғистон Республикаси ИИВ томонидан терговга қадар текшириш ҳаракатлари олиб борилмоқда.
Изоҳ (0)