Sirdaryo viloyatida Sardoba suv toshqinidan keyin evakuatsiya qilingan aholi uchun mo‘ljallangan nooziq-ovqat mahsulotlarini soxta hujjat orqali talon-toroj qilish holatlari kuzatilgan. Bu haqda Bosh prokuratura axborot xizmati rahbari Hayot Shamsutdinov “Daryo”ga ma’lum qildi.
Qayd etilishicha, fuqaro M.J. Sardoba toshqinidan keyin 21-sonli maktabga evakuatsiya qilingan aholi uchun zarur nooziq-ovqat mahsulotlarini olib kelish uchun Sardoba tuman Qizil yarim oy jamiyati rahbari nomidan soxta hujjatlar tayyorlagan. U 53 million so‘mlik mahsulotlarni maxsus ombordan olib chiqib, noma’lum shaxslarga sotib yuborgan.
Mazkur holat yuzasidan M.J.ga nisbatan Jinoyat kodeksining 168-moddasi (Firibgarlik) 3-qismi “b” bandi bilan jinoyat ishi qo‘zg‘atilib, tergov harakatlari o‘tkazilmoqda.
2020-yil 7-iyulda Toshkentning Sergeli tumanida ijtimoiy himoyaga muhtoj oilalar uchun xayriya hisobiga kelib tushgan 95,8 million so‘m mablag‘lar “Mahalla” xayriya jamoat fondi Sergeli bo‘limi mansabdor shaxslari tomonidan talon-toroj qilingani ma’lum bo‘lgan.
19-iyulda Qashqadaryo sanitariya-epidemiologiya osoyishtalik markazida qariyb 918 million so‘mlik budjet mablag‘lari talon-toroj qilingani aniqlangan.
23-iyulda Andijon viloyati Sanitariya-epidemiologik osoyishtalik markazi mansabdor shaxslari dezinfeksiyalovchi vositalar xarid qilish jarayonida 159,3 million so‘mlik budjet mablag‘larini talon-toroj qilgani oydinlashdi. Shuningdek, shu kuni Andijon viloyati Shahrixon tumanida kam ta’minlangan oilalarga ajratilgan 82,2 million so‘m budjet mablag‘lari talon-toroj etilgani aniqlangani xabar qilindi.
17-iyulda Moliya vazirligining Davlat moliyaviy nazorati departamenti tomonidan 2020-yilning birinchi yarim yilligida 2 584 ta moliyaviy nazorati tadbirlari o‘tkazilib, natijada 81,7 milliard so‘m miqdoridagi budjet pullari noqonuniy sarflangani aniqlangan.
Izoh (0)