Сирдарё вилоятида Сардоба сув тошқинидан кейин эвакуация қилинган аҳоли учун мўлжалланган ноозиқ-овқат маҳсулотларини сохта ҳужжат орқали талон-торож қилиш ҳолатлари кузатилган. Бу ҳақда Бош прокуратура ахборот хизмати раҳбари Ҳаёт Шамсутдинов «Дарё»га маълум қилди.
Қайд этилишича, фуқаро М.Ж. Сардоба тошқинидан кейин 21-сонли мактабга эвакуация қилинган аҳоли учун зарур ноозиқ-овқат маҳсулотларини олиб келиш учун Сардоба туман Қизил ярим ой жамияти раҳбари номидан сохта ҳужжатлар тайёрлаган. У 53 миллион сўмлик маҳсулотларни махсус омбордан олиб чиқиб, номаълум шахсларга сотиб юборган.
Мазкур ҳолат юзасидан М.Ж.га нисбатан Жиноят кодексининг 168-моддаси (Фирибгарлик) 3-қисми «б» банди билан жиноят иши қўзғатилиб, тергов ҳаракатлари ўтказилмоқда.
2020 йил 7 июлда Тошкентнинг Сергели туманида ижтимоий ҳимояга муҳтож оилалар учун хайрия ҳисобига келиб тушган 95,8 миллион сўм маблағлар «Маҳалла» хайрия жамоат фонди Сергели бўлими мансабдор шахслари томонидан талон-торож қилингани маълум бўлган.
19 июлда Қашқадарё санитария-эпидемиология осойишталик марказида қарийб 918 миллион сўмлик бюджет маблағлари талон-торож қилингани аниқланган.
23 июлда Андижон вилояти Санитария-эпидемиологик осойишталик маркази мансабдор шахслари дезинфекцияловчи воситалар харид қилиш жараёнида 159,3 миллион сўмлик бюджет маблағларини талон-торож қилгани ойдинлашди. Шунингдек, шу куни Андижон вилояти Шаҳрихон туманида кам таъминланган оилаларга ажратилган 82,2 миллион сўм бюджет маблағлари талон-торож этилгани аниқлангани хабар қилинди.
17 июлда Молия вазирлигининг Давлат молиявий назорати департаменти томонидан 2020 йилнинг биринчи ярим йиллигида 2 584 та молиявий назорати тадбирлари ўтказилиб, натижада 81,7 миллиард сўм миқдоридаги бюджет пуллари ноқонуний сарфлангани аниқланган.
Изоҳ (0)