Namangan viloyatida COVID-19 koronavirus infeksiyasi bilan kasallangan 62 yoshli J.Sh. ismli ayol vafot etdi. Bu haqda Sog‘liqni saqlash vazirligi xabar qilgan.
Xabarga ko‘ra, Namangan viloyati Namangan shahrida yashagan 62 yoshli J.Sh.da COVID-19 tasdiqlangach (qachon tasdiqlangani haqida axborot berilmagan) u viloyat yuqumli kasalliklar shifoxonasiga yotqizilgan.
Unga COVID-19 infeksiyasining o‘ta og‘ir kechishi, ikki tomonlama pnevmoniya tashxisi qo‘yilgan. Kasallik o‘tkir nafas va yurak yetishmovchiligi asoratlari bilan kechgan.
Shuningdek, bemor qandli diabet (II tip, insulinga muhtoj shakli), bronxial astma kabi hamroh kasalliklar bilan ham og‘rigan.
20-iyul kuni bemorning ahvoli og‘irlashib, unga o‘pka-yurak reanimatsiyasi o‘tkazilgan hamda J.Sh. sun’iy nafas oldirish apparatiga ulangan.
Bemorga mutaxassislar tomonidan onlayn konsultatsiya va konsiliumlar o‘tkazilgan, davolash jarayoni belgilangan standartlar asosida olib borilgan.
Biroq asosiy kasallik asoratlari hisobiga bemorning ahvoli keskin og‘irlashib, mutaxassislar tomonidan to‘liq hajmda, standart asosida o‘tkazilgan reanimatsion choralar samara bermay, u o‘tkir nafas va yurak-qon tomir yetishmovchiligidan vafot etgan, deyiladi SSV axborotida.
Namangan shahrida yashagan 62 yoshli J.Sh. “Daryo” hisobi bo‘yicha koronavirus asoratlaridan vafot etgan 112-bemorga aylandi. SSV statistikasi bo‘yicha 24-iyul soat 23:30 holatiga ko‘ra, 107 nafar bemor COVID-19 asoratlari oqibatida vafot etgan. Shuningdek, 62 yoshli ayol Namanganda COVID-19 asoratlari oqibatida hayotdan ko‘z yumgan 5-bemor.
Davlat xizmatlari agentligi 15-iyul kuni Navoiy viloyatidagi 61 yoshli xodimi Adhamjon Dehqonov, Madaniyat vazirligi esa 18-iyul kuni 32 yoshli xodimi Akmal Irisov koronavirus asoratlaridan vafot etgani, Olmaliq shahri hokimligi 9 va 15-iyul kunlari shahar shifoxonalarida vafot etgan ikki ayolda koronavirus tasdiqlangani haqida xabar bergan. 22-iyulda O‘zbekiston bosh prokurorining sobiq o‘rinbosari Hakimbay Xalimov 66 yoshida koronavirus asoratlaridan vafot etgani, shuningdek, koronavirusga chalingan Qoraqalpog‘iston Respublikasi Qonliko‘l tumani hokimi Daulet Tolibayevning 24-iyul kuni hayotdan ko‘z yumgani haqida xabarlar berilgan. Ammo SSV tomonidan ushbu holatlar haqida ayni vaqtgacha axborot berilmadi.
Izoh (0)