Наманганда коронавирусга чалинган 62 ёшли аёл ҳаётдан кўз юмди. Бу вилоятдаги 5-ўлим ҳолати

Наманган вилоятида COVID-19 коронавирус инфекцияси билан касалланган 62 ёшли Ж.Ш. исмли аёл вафот этди. Бу ҳақда Соғлиқни сақлаш вазирлиги хабар қилган.

Хабарга кўра, Наманган вилояти Наманган шаҳрида яшаган 62 ёшли Ж.Ш.да COVID-19 тасдиқлангач (қачон тасдиқлангани ҳақида ахборот берилмаган) у вилоят юқумли касалликлар шифохонасига ётқизилган.

Унга COVID-19 инфекциясининг ўта оғир кечиши, икки томонлама пневмония ташхиси қўйилган. Касаллик ўткир нафас ва юрак етишмовчилиги асоратлари билан кечган.

Шунингдек, бемор қандли диабет (II тип, инсулинга муҳтож шакли), бронхиал астма каби ҳамроҳ касалликлар билан ҳам оғриган.

20 июль куни беморнинг аҳволи оғирлашиб, унга ўпка-юрак реанимацияси ўтказилган ҳамда Ж.Ш. сунъий нафас олдириш аппаратига уланган.

Беморга мутахассислар томонидан онлайн консультация ва консилиумлар ўтказилган, даволаш жараёни белгиланган стандартлар асосида олиб борилган.

Бироқ асосий касаллик асоратлари ҳисобига беморнинг аҳволи кескин оғирлашиб, мутахассислар томонидан тўлиқ ҳажмда, стандарт асосида ўтказилган реанимацион чоралар самара бермай, у ўткир нафас ва юрак-қон томир етишмовчилигидан вафот этган, дейилади ССВ ахборотида.

Наманган шаҳрида яшаган 62 ёшли Ж.Ш. «Дарё» ҳисоби бўйича коронавирус асоратларидан вафот этган 112-беморга айланди. ССВ статистикаси бўйича 24 июль соат 23:30 ҳолатига кўра, 107 нафар бемор COVID-19 асоратлари оқибатида вафот этган. Шунингдек, 62 ёшли аёл Наманганда COVID-19 асоратлари оқибатида ҳаётдан кўз юмган 5-бемор.

Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган. 22 июлда Ўзбекистон бош прокурорининг собиқ ўринбосари Ҳакимбай Халимов 66 ёшида коронавирус асоратларидан вафот этгани, шунингдек, коронавирусга чалинган Қорақалпоғистон Республикаси Қонликўл тумани ҳокими Даулет  Толибаевнинг 24 июль куни ҳаётдан кўз юмгани ҳақида хабарлар берилган. Аммо ССВ томонидан ушбу ҳолатлар ҳақида айни вақтгача ахборот берилмади.