Qashqadaryo viloyatida koronavirusga chalingan 35 yoshli ayol vafot etdi, deb xabar berdi Sog‘liqni saqlash vazirligi.
Qayd etilishicha, Qashqadaryo viloyati Qarshi shahrida yashagan 35 yoshli U.Yu. ismli ayol 14-iyul kuni isitma, hansirash va havo yetishmasligi kabi shikoyatlar dinamikada kuchayganligi sababli Qarshi shahar tug‘ruq kompleksining ginekologiya bo‘limiga og‘ir ahvolda olib kelingan. Bemor infeksionist ko‘rigidan so‘ng COVID-19’ga shubha qilinib, viloyat pulmonologiya va ftiziatriya markazi reanimatsiya bo‘limiga yotqizilgan.
Unga COVID-19 infeksiyasining o‘ta og‘ir kechishi, ikki tomonlama pnevmoniya tashxisi qo‘yilgan. Xastalik o‘tkir nafas yetishmovchiligi asorati bilan kechgan.
Bemorga mutaxassislar tomonidan onlayn konsultatsiya va konsiliumlar o‘tkazilgan, davolash jarayoni belgilangan standartlar asosida olib borilgan. Ammo bemorning ahvoli keskin yomonlasha boshlagan va intubatsiya qilingan, o‘pka-yurak reanimatsiyasi o‘tkazilgan.
Mutaxassislar tomonidan to‘liq hajmda, standart asosida o‘tkazilgan reanimatsion muolajalarga qaramasdan bemor o‘tkir nafas va yurak-qon tomir yetishmovchiligidan vafot etgan, deyiladi SSV xabarida.
Qashqadaryo viloyatining koronavirus bo‘yicha maxsus shtabining “Daryo”ga ma’lum qilishicha, vafot etgan 35 yoshli ayol homilador bo‘lgan.
Qarshi shahrida yashovchi 35 yoshli U.Yu. “Daryo” hisobi bo‘yicha koronavirus asoratlaridan vafot etgan 111-bemorga aylandi. SSV statistikasi bo‘yicha 24-iyul soat 23:30 holatiga ko‘ra, 105 nafar bemor COVID-19 asoratlari oqibatida hayotdan ko‘z yumgan. Qashqadaryo viloyatining o‘zida COVID-19 asoratlari oqibatida vafot etganlar soni 4 nafarga yetgan. 23-iyul kuni Qashqadaryoda koronavirusga chalingan 64 yoshli erkak vafot etgandi.
Davlat xizmatlari agentligi 15-iyul kuni Navoiy viloyatidagi 61 yoshli xodimi Adhamjon Dehqonov, Madaniyat vazirligi esa 18-iyul kuni 32 yoshli xodimi Akmal Irisov koronavirus asoratlaridan vafot etgani, Olmaliq shahri hokimligi 9 va 15-iyul kunlari shahar shifoxonalarida vafot etgan ikki ayolda koronavirus tasdiqlangani haqida xabar bergan. 22-iyulda O‘zbekiston bosh prokurorining sobiq o‘rinbosari Hakimbay Xalimov 66 yoshida koronavirus asoratlaridan vafot etgani, shuningdek, koronavirusga chalingan Qoraqalpog‘iston Respublikasi Qonliko‘l tumani hokimi Daulet Tolibayevning 24-iyul kuni hayotdan ko‘z yumgani haqida xabarlar berilgan. Ammo SSV tomonidan ushbu holatlar haqida ayni vaqtgacha axborot berilmadi.
Izoh (0)