“Real” klubining yozgi transfer oynasi vaqtidagi rejalari ma’lum bo‘ldi. Marca nashrining yozishicha, madridliklar klubi koronavirus pandemiyasidan keyingi zararlarni (taxminan 200 million yevro) qoplash maqsadida bir qator futbolchilar bilan xayrlashish niyatida.
Ta’kidlanishicha, “Real”ni Xames Rodriges, Garet Beyl, Luka Yovich va Mariano Dias kabi futbolchilar tark etishi mumkin. Mazkur futbolchilarni sotib yuborish “Real”ning yozdagi asosiy maqsadi hisoblanadi.
Xamesning klub bilan amaldagi shartnomasi 2021-yilda o‘z nihoyasiga yetadi. Madridliklar futbolchi transferidan 25 million yevro atrofida pul ishlab olmoqchi. Transferga kolumbiyalik futbolchining yuqori maoshi to‘sqinlik qilishi mumkin (hozirda u yiliga 8 million yevro maosh oladi).
Ta’kidlanishicha, Xamesga “Manchester Yunayted”, “Milan”, “Inter” va “Benfika”dan qiziqish bor.
Beylning “Real” bilan kelishuvi 2022-yilning yoziga qadar mo‘ljallangan. Klub yiliga 17 million yevro maosh oladigan futbolchi bilan xayrlashishni birinchi o‘ringa qo‘ymoqda. Biroq uelslik futbolchi “Real”dan ketishni istamayapti. Agar Garet jamoada qoladigan bo‘lsa, “Real” unga maosh to‘lash uchun 60 million yevro atrofida pul sarflashiga to‘g‘ri keladi.
Kelasi mavsum “Real”ning 11 nafar futbolchisi ijaradan qaytadi va tarkibda 37 futbolchi bo‘ladi. Shu sabab klub Luka Modrich, Nacho va Lukas Vaskesni sotish borasida ham bosh qotirmoqda, biroq ularning transferi birinchi galdagi vazifa bo‘lmaydi.“Qaymoqranglilar” shuningdek, ijarada bo‘lib turgan Dani Sebalyos, Alvaro Odriosola, Oskar Rodriges, Xesus Valyexo, Borxa Mayoral va Xorxe de Frutos kabi futbolchilarini ham sotishga tayyor.
Avvalroq “Real” joriy mavsum yakunida katta xaridlar amalga oshirmasligi ma’lum qilingandi.
Garet Beylning La Ligada urgan top-25 golini tomosha qiling (video)
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)