«Реал» клубининг ёзги трансфер ойнаси вақтидаги режалари маълум бўлди. Marca нашрининг ёзишича, мадридликлар клуби коронавирус пандемиясидан кейинги зарарларни (тахминан 200 миллион евро) қоплаш мақсадида бир қатор футболчилар билан хайрлашиш ниятида.
Таъкидланишича, «Реал»ни Хамес Родригес, Гарет Бэйл, Лука Йович ва Мариано Диас каби футболчилар тарк этиши мумкин. Мазкур футболчиларни сотиб юбориш «Реал»нинг ёздаги асосий мақсади ҳисобланади.
Хамеснинг клуб билан амалдаги шартномаси 2021 йилда ўз ниҳоясига етади. Мадридликлар футболчи трансферидан 25 миллион евро атрофида пул ишлаб олмоқчи. Трансферга колумбиялик футболчининг юқори маоши тўсқинлик қилиши мумкин (ҳозирда у йилига 8 миллион евро маош олади).
Таъкидланишича, Хамесга «Манчестер Юнайтед», «Милан», «Интер» ва «Бенфика»дан қизиқиш бор.
Бэйлнинг «Реал» билан келишуви 2022 йилнинг ёзига қадар мўлжалланган. Клуб йилига 17 миллион евро маош оладиган футболчи билан хайрлашишни биринчи ўринга қўймоқда. Бироқ уэлслик футболчи «Реал»дан кетишни истамаяпти. Агар Гарет жамоада қоладиган бўлса, «Реал» унга маош тўлаш учун 60 миллион евро атрофида пул сарфлашига тўғри келади.
Келаси мавсум «Реал»нинг 11 нафар футболчиси ижарадан қайтади ва таркибда 37 футболчи бўлади. Шу сабаб клуб Лука Модрич, Начо ва Лукас Васкесни сотиш борасида ҳам бош қотирмоқда, бироқ уларнинг трансфери биринчи галдаги вазифа бўлмайди.«Қаймоқранглилар» шунингдек, ижарада бўлиб турган Дани Себальос, Альваро Одриосола, Оскар Родригес, Хесус Вальехо, Борха Майораль ва Хорхе де Фрутос каби футболчиларини ҳам сотишга тайёр.
Аввалроқ «Реал» жорий мавсум якунида катта харидлар амалга оширмаслиги маълум қилинганди.
Гарет Бэйлнинг Ла Лигада урган топ-25 голини томоша қилинг (видео)
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)