Sanitariya-epidemiologiya nazorati davlat inspeksiyasi bosh inspektori Nurmat Otabekov koronavirus vaksinasi borasidagi gaplarga aniqlik kiritib o‘tdi.

Bugungi kunda butun dunyoning turli mamlakatlarida olimlar tomonidan pandemiyani kelib chiqishiga sabab bo‘lgan koronavirus infeksiyasiga qarshi 300 xildagi vaksina sinovdan o‘tkazilayotgani va bu boradagi izlanishlar yaqin kunlarda oxiriga yetishi bildirildi.

“Vaksinalarni ishlab chiqarish uchun bir necha bosqichlar talab etiladi. Birinchi bosqich, klinikasiz, ya’ni vaksinalarni sinash uchun klinikagacha bo‘lgan fazasi bugungi kunda tugallangan bo‘lib, endi ularni sinashning klinik fazasiga o‘tilgan.

O‘z navbatida klinik fazalarning o‘zi 3 ta fazadan iborat bo‘lib, birinchi fazada bir nechta odamda, ikkinchi fazada har xil yoshdagi guruhlarda, ya’ni bolalar, kattalar va yoshi katta odamlarda o‘tkaziladi. Va nihoyat uchinchi fazada mingdan ortiq odamlar sinovdan o‘tkaziladi. Shundan so‘ng tabiiy samarasi baholanib, amaliyotda qo‘llashga kiritiladi. Vaksina tayyorlashning ham o‘ziga yarasha qiyinchiliklari bor. Agar vaksina qo‘llanilib, undan keyin ham kasallik yuqadigan bo‘lsa, bunday vaksinadan nima naf?”.

Vaksinalarni tezlik bilan sinovdan o‘tkazishning o‘zi 6 oy vaqtni olishi, shu vaqt davomida immunizatsiya qilingan odamlarda vaksinaning samaradorligi va nojo‘ya ta’sirlari o‘rganilishib qo‘shimcha qilindi.

Eslatib o‘tamiz, Koronavirusga qarshi kurashish shtabi a’zosi Barno Odilova ham koronavirus vaksinasining O‘zbekistonga olib kelinishi haqidagi masalaga aniqlik kiritgan bo‘lsa, JSST koronavirusga qarshi vaksinatsiya 2021-yildan oldinroq boshlanmasligini bildirgan.