Давлат солиқ қўмитаси 22 июль, чоршанба куни савдо чеклари асосида ўтказиладиган ютуқли ўйиннинг биринчи тиражини ўтказди. Ўйинда Тошкент шаҳрида онлайн назорат кассалари ва виртуал кассалар орқали рўйхатдан ўтган 9947 та чек иштирок этди. Бу ҳақда қўмита матбуот хизмати хабар берди.
Турли ютуқлар қўйилган ўйинда Chevrolet Nexia-3 автомобили соҳиби аниқланди. Шунингдек, тўртта велосипед ва турли маиший техникалар ҳам ўз эгаларини топди. Ўйин MY5 телеканалида жонли эфирда ўтказилди.
Ўйинда совриндор бўлган ҳар бир ғолибга бир кун ичида ташкилотчилар томонидан SMS хабар жўнатилади ва унда ютуқни қаерда ва қачон олиш мумкинлиги кўрсатилади.
Қўмита томонидан маълум қилинишича, 22 июль куни рўйхатдан ўтказилган чеклар ўйиннинг иккинчи тиражида иштирок этади.
Эслатиб ўтамиз, Ўзбекистонда тадбиркорлик субъектлари ва савдо шохобчаларида онлайн-назорат кассалари ва виртуал кассалар жорий қилинмоқда. Аҳолининг харидлар учун чек талаб қилиши ва мазкур кассалардан фойдаланишни кўпайтириш мақсадида савдо чеклари асосида ўтказиладиган чек лотереяси жорий қилинди. Мазкур чекли ўйин июль ойидан бошланди.
Изоҳ (0)