“ Akfa universitetining moddiy-texnik bazasini mustahkamlash bo‘yicha qo‘shimcha chora-tadbirlar to‘g‘risida”gi qaror loyihasi muhokamaga qo‘yilgani haqida xabar berilgandi. Monopoliyaga qarshi kurashish qo‘mitasi mazkur qaror loyihasining ayrim bandlari “Raqobat to‘g‘risida”gi qonun va bir qator Prezident qarorlari talablariga zid kelishini ma’lum qildi.
Sog‘liqni saqlash vazirligi tomonidan Normativ-huquqiy hujjatlar loyihalari muhokamasi portaliga qo‘yilgan O‘zbekiston Respublikasi Vazirlar Mahkamasining Akfa universitetining moddiy-texnik bazasini mustahkamlash bo‘yicha qo‘shimcha chora-tadbirlar to‘g‘risida’gi qarori loyihasi Monopoliyaga qarshi kurashish qo‘mitasi tomonidan Adliya vazirligida 2019-yil 19-aprelda 3155-son bilan ro‘yxatga olingan qonun hujjatlarining raqobatga ta’sirini baholash metodikasi asosida ko‘rib chiqilgan”, — deyiladi qo‘mita xabarida.
Qayd etish joizki, Sog‘liqni saqlash vazirligi tomonidan muhokamaga qo‘yilgan mazkur hujjat Prezidenti qarori loyihasi hisoblanadi. Monopoliyaga qarshi kurash qo‘mitasi esa o‘z xulosasida mazkur hujjatni Vazirlar Mahkamasi qarori loyihasi deb atagan.
Loyihaning 2-bandida Toshkent viloyat hokimligi, Yer resurslari, geodeziya, kartografiya va davlat kadastri davlat qo‘mitasi bilan birgalikda bir oy muddatda universitetga zamonaviy o‘quv binolari, o‘quv-amaliyot binolari, kampuslar, sport inshootlari qurish va jihozlash uchun Toshkent viloyati, Qibray tumani, “O‘nqo‘rg‘on” QFY, “Parvoz” MFY hududida joylashgan “Manzarali bog‘dorchilik va gulchilik” MChJ balansida bo‘lgan 29,48 gektar yer maydonini doimiy foydalanishga ajratib berish ko‘zda tutilgan. “Manzarali bog‘dorchilik va gulchilik” MChJga qarashli mulklarni buzish, daraxt ko‘chatlarini Toshkent shahriga ekish uchun ko‘chirish ishlarini Toshkent shahar hokimligiga yuklash rejalashtirilgan.
Qo‘mita xulosasida qayd etilishicha, 2018-yil 20-apreldagi “Tadbirkorlik va shaharsozlik faoliyatini amalga oshirish uchun yer uchastkalarini doimiy foydalanishga berish tartibini tubdan takomillashtirish chora-tadbirlari to‘g‘risida”gi PQ-3677-sonli qarorining 1-bandiga asosan 2018-yil 1-iyuldan boshlab yuridik va jismoniy shaxslarga tadbirkorlik va shaharsozlik faoliyatini amalga oshirish uchun yer uchastkalarini doimiy foydalanishga berish “E-ijro auksion” yagona elektron savdo maydonchasida elektron auksion orqali amalga oshirish tartibi o‘rnatilgan.
Shuningdek, qaror loyihasining 4-bandida Vazirlar Mahkamasining 2019-yil 15-fevraldagi “Akfa universitetini tashkil etish to‘g‘risida”gi 130-son qarori bilan universitetga belgilangan shartlar hamda imtiyozlar muhokama qilinayotgan ushbu qaror kuchga kirgandan boshlab 3 yil muddatga to‘liq qo‘llanishi ko‘zda tutilgan. Bundan tashqari, loyihada istisno tariqasida, universitetga 2021-yil 1-aprelga qadar qurilish ishlarini loyiha-smeta hujjatlarini ishlab chiqish bilan bir vaqtda olib borish hamda loyiha hujjatlarini dunyoning ilg‘or (Janubiy Koreya, Germaniya, Turkiya) davlatlari qurilish normalari asosida amalga oshirishga ruxsat berilishi belgilangan.
Monopoliyaga qarshi kurash qo‘mitasi mazkur imtiyozlarni berish masalasida o‘z xulosasini bayon qildi. Unga ko‘ra, “Raqobat to‘g‘risida”gi qonunining 12-moddasiga muvofiq, davlat boshqaruvi organlari va mahalliy davlat hokimiyati organlarining ayrim xo‘jalik yurituvchi subyektlarga ularni tovar yoki moliya bozorida faoliyat ko‘rsatayotgan boshqa xo‘jalik yurituvchi subyektlarga nisbatan afzal holatga qo‘yadigan imtiyozlar, preferensiyalar va yengilliklarni asossiz ravishda berishi taqiqlanishi ko‘rsatilgan.
Bundan tashqari, Prezidentining 2018-yil 31-maydagi “Imtiyozlar va preferensiyalar berish tartibini tubdan takomillashtirish chora-tadbirlari to‘g‘risida”gi PQ-3756-sonli qaroriga asosan soliq va bojxona imtiyozlari hamda preferensiyalar qonunlar va O‘zbekiston Prezidenti hujjatlari bilan umuman tarmoqlar, faoliyat sohalari, hududlar uchun beriladi. Vaqtinchalik imtiyozlar O‘zbekiston Prezidenti hujjatlari bilan 3 yildan ortiq bo‘lmagan muddatga beriladi, individual imtiyozlar, alohida hollarda, xususiy sektor investitsiya kiritishdan manfaatdor bo‘lmagan tarmoqlarda ijtimoiy ahamiyatga ega loyihalarni amalga oshirish uchun, aniq ijtimoiy yoki iqtisodiy asoslar mavjud bo‘lganda yoxud O‘zbekistonning xalqaro shartnomalariga muvofiq, Prezident hujjatlari bilan taqdim etiladi.
Qo‘mitaning bildirishicha, Akfa universitetiga imtiyoz berish ta’lim bozorida faoliyat olib borayotgan boshqa xususiy ta’lim muassasalariga nisbatan ustunlik berilishiga olib keladi va raqobat muhitiga salbiy ta’sir ko‘rsatadi. “Ushbularni inobatga olib, qaror loyihasining 4-bandi ikkinchi va to‘rtinchi xatboshilarni chiqarib tashlash lozim. Shuningdek, qaror loyihasini amaldagi qonunchilik talablariga moslashtirish zarur hisoblanadi”, — deyiladi qo‘mita xulosasida.
“Mazkur qaror loyihasining qabul qilinishi oqibatida boshqa xo‘jalik yurituvchi subyektlarga nisbatan afzal holatga qo‘yadigan imtiyozlar, preferensiyalar va yengilliklar berilishi “Raqobat to‘g‘risida”gi qonunning 12-moddasi, 2017-yil 8-sentabrdagi PF-5185-son farmoni bilan tasdiqlangan O‘zbekiston Respublikasida Ma’muriy islohotlar konsepsiyasiga, Prezidentning 2018-yil 31-maydagi PQ-3756-sonli qarori talablariga zid ekanligini inobatga olib, qarorni mazkur qonunchilik hujjatlari talablariga moslashtirilgandan so‘ng qabul qilinishi maqsadga muvofiq hisoblanadi”, — deya xulosa qilgan qo‘mita.
Avvalroq Monopoliyaga qarshi kurashish qo‘mitasi O‘zbekistonda qator korxonalarga eksklyuziv imtiyozlar berish huquqini bekor qilishni ko‘zda tutuvchi Prezident farmoni loyihasini muhokamaga qo‘ygandi. Farmon loyihasida Akfa universitetiga berilgan soliq va bojxona imtiyozlarini bekor qilish ko‘zda tutilgan.
Izoh (0)