Ўзбекистонда 1 августдан бошлаб яна қатор солиқ имтиёзлари бекор қилинади

Ўзбекистон Президентининг 8 июлдаги ПФ-6021-сон фармони билан мамлакатда яна қатор солиқ имтиёзлари бекор қилинади, деб хабар беради Norma.

Хусусан, 2020 йил 1 августдан бошлаб:

биринчидан, Дастурий маҳсулотлар ва ахборот технологиялари технологик парки (Технопарк) резидентлари дивидендларни чет эл валютасида тўлаш ҳуқуқидан маҳрум этилади. Эслатиб ўтамиз, мазкур преференция 2019 йил декабрда тугатилган Mirzo Ulugbek Innovation Center резидентларига тақдим этилган, кейинроқ Технопарк резидентларига нисбатан татбиқ этилган эди;

иккинчидан, четдан жалб этиладиган хорижий мутахассисларга чет эл валютасида ҳақ тўлайдиган ташкилотлар маблағларни уларнинг хориждаги ҳисобварақларига ўтказишлари керак. Эслатиб ўтамиз, Президентнинг турли қарорлари билан қуйидагиларга ана шундай ҳуқуқ берилган:

• компаниялар – LG SNC Uzbekistan QK, «Ўзбекгидроэнерго» АЖ, « ‘Пахтакор’ футбол клуби» МЧЖ ва «Ўзбекистон тарихи» телеканалига;
• илмий-маърифий ташкилотлар – мамлакат олий таълим муассасалари, педагог кадрларни қайта тайёрлаш ва малакасини ошириш бўйича соҳа марказлари, Ўзбекистон—Япония ёшлар инновация маркази ва Ўқув-амалий тўқимачилик технопаркига;
• давлат муассасалари – Ахборот коммуникациялари вазирлиги, Адлия вазирлиги, Иқтисодий тараққиёт ва камбағалликни қисқартириш вазирлиги, Энергетика вазирлиги, Транспорт вазирлиги, Инвестициялар ва ташқи савдо вазирлиги, Қишлоқ хўжалиги вазирлиги, Давлат ветеринария қўмитаси, Интеллектуал мулк агентлиги, «Ўзстандарт» ва «Рақамли ишонч» жамғармасига.

учинчидан, мижозларнинг талабномалари бўйича банклар томонидан сотиб олинган ва 15 иш куни мобайнида фойдаланилмаган хорижий валютани сўзсиз қайта сотиш ҳақидаги талаб бекор қилинади;

тўртинчидан, қуйидаги солиқ имтиёзлари бекор қилинади:

а) 2009 йил 28 июлдаги ПҚ-1166-сон қарорда назарда тутилган қуйидаги муддатга озод қилиш шаклидаги:

• 5 йил муддатга – юридик шахслар тижорат банкларининг депозитларига ва қимматли қарз қоғозларига 1 йилдан ортиқ муддатга жойлаштиришдан олинадиган фоизли даромадлари бўйича солиққа тортишдан;
• 3 йил муддатга – лизинг хизматлари кўрсатувчи юридик шахслар фойда солиғи ва лизинг операцияларидан тушадиган даромадлар бўйича айланмадан олинадиган солиқни тўлашдан;

бешинчидан, 2017 йил 3 ноябрдаги ПҚ-3351-сон ва 2019 йил 30 майдаги ПҚ-4348-сон қарорлардан экспорт ва импорт операциялари доирасидаги алоҳида муддатлар чиқариб ташланмоқда. Шу туфайли янги Ташқи савдо операциялари амалга оширилиши мониторингини олиб бориш ва назорат қилиш тартиби тўғрисидаги низом билан юзага келадиган эҳтимолий зиддиятлар бартараф этилади.

Ҳужжат қонун ҳужжатлари маълумотлари миллий базасида эълон қилинган.

Аввалроқ Монополияга қарши курашиш қўмитаси «Ўзметкомбинат»нинг қора металларни, «Ўзиккиламчиранглиметалл»нинг рангли металларни, «Давлатбелгиси»нинг турли хил қоғоз маҳсулотларини ишлаб чиқаришидаги монопол ҳолати ва эксклюзив ҳуқуқлари, «Ўзстандарт» агентлигига тегишли ўлчов воситаларини текшириш ва штрих-кодларни бериш бўйича корхоналари каби монополияларни бекор қилишни таклиф этганди.