O‘zbekistonda farzandlarini bolalar bog‘chalariga joylashtirishda imtiyozga ega bo‘lgan shaxslar toifalarini qisqartirish rejalashtirilmoqda. Bu haqdagi hukumat qarori loyihasi muhokama uchun e’lon qilindi.
Foto: O‘zA
Davlat xizmatlari agentligining ma’lum qilishicha, ilgari ijtimoiy tarmoqlarda bolalarni davlat bog‘chalariga joylashtirishda bir qator imtiyozi mavjud shaxslarning farzandlariga beriladigan imtiyozlar yuzasidan ancha noroziliklar uchrar edi. Davlat xizmatlari agentligi tomonidan o‘tkazilgan ijtimoiy so‘rov natijalari ham bundan dalolat beradi.
Qayd etilishicha, muhokamaga qo‘yilgan loyihada bolalarni davlat bog‘chalariga qabul qilish bo‘yicha davlat xizmatlari ko‘rsatishning ma’muriy reglamentida mavjud imtiyozlar qisqartirilmoqda.
Endilikda faqatgina ikki toifadagi shaxslar, ya’ni birinchi va ikkinchi guruh nogironligi bo‘lgan shaxslarning bolalari hamda yetim bolalar yoki ota-onasining qarovisiz qolgan bolalar uchun imtiyozlar qoldirilmoqda.
Shuningdek, faqatgina bolaning ota-onasi emas, balki yaqin qarindoshlariga ham yo‘llanma olish imkoniyati yaratilmoqda. Misol uchun, avval bolaning bobo va buvilari nevaralari uchun ariza yuborishi mumkin emas edi.
Bundan tashqari, maktabgacha ta’lim axborot tizimini takomillashtirish va uni Maktabgacha ta’lim vazirligining rasmiy veb-sayti bilan integratsiya qilish orqali bog‘chalardagi tarbiyalanuvchilar va bo‘sh o‘rinlar haqidagi ma’lumotlarni real vaqt rejimida yuritish, navbatlarni shakllantirish va ularning elektron hisobini olib borish, yo‘llanma va xabarnomalar berish imkoniyatini joriy etish nazarda tutilmoqda.
Bolalarni davlat maktabgacha ta’lim muassasalariga qabul qilish jarayonining aktuallashtirilganligi hamda muassasalardagi bo‘sh joylarning elektron hisobini yuritish, bolalarni muassasalarga qabul qilish uchun elektron navbatni shakllantirish, bolalarni muassasalarga qabul qilish uchun yo‘llanmalarni rasmiylashtirish maktabgacha ta’lim axborot tizimi tomonidan amalga oshirilishi yo‘lga qo‘yilganligi sababli tegishli o‘zgartirishlar kiritilmoqda.
Ta’kidlanishicha, qaror loyihasining qabul qilinishi davlat budjeti mablag‘laridan ortiqcha xarajatlarni talab etmaydi. Qaror loyihasining muhokamasi 23-iyulgacha davom etadi.
Eslatib o‘tamiz, 15-iyundan boshlab O‘zbekistonning “yashil” va “sariq” hududlarda xususiy maktabgacha ta’lim tashkilotlarida mashg‘ulotlarni 15 kishidan ortiq bo‘lmagan guruhlarda tashkil etishga ruxsat etilgandi. Mamlakatda koronavirus bilan bog‘liq vaziyatning keskinlashayotgani sababli 10-iyuldan 1-avgustgacha mamlakatda qat’iy karantin choralari joriy qilindi. 10-iyuldan bolalar bog‘chalari yana yopildi,
