Amerikaning Minneapolis shahrida istiqomat qiluvchi erkak mastlikda qayergadir qoldirib ketgan o‘zining Toyota Camry Hybrid mashinasini qidirmoqda, deb xabar beradi Motor.
E’londa yozilishicha, haydovchi o‘zining mashinasi yo‘qolgan paytda mast bo‘lgan va avtomobilini qayerga qoldirib ketganini eslay olmayapti. 2007-yilda ishlab chiqarilgan sedanning rasmi tushirilgan e’lon shahardagi daraxt va simyog‘ochlarga ilib chiqilgan.
“Balki men sizning yoki bolangizning hayotini saqlab qolgandirman… Biroq endi o‘zimning mashinamni topa olmayapman. Juda ko‘p ichganim sabab uni yo‘l bo‘yida qoldirib, do‘stim bilan uyga ketgandim”, — deyiladi e’londa.
Amerikalikning eslashicha, u maydoni million kvadrat metrga yetadigan Xennepin okrugining shimoliy qismida bo‘lgan va mashinani yo‘l bo‘yida qoldirgan. Sedanni topgan kishiga mukofot va’da qilingan.
Reddit foydalanuvchilari Camry’ning egasini uyiga eltib qo‘ygan do‘sti ham mast holatga bo‘lganligini gumon qilmoqda. Shuningdek, foydalanuvchilar e’lon muallifiga keyingi safar mashina to‘xtagan joyni GPS-koordinataga ega smartfon yordamida suratga olishni maslahat bergan.
Izoh (0)