AQShda eski uyini sog‘ingan it bir shtatdan boshqasiga 90 kilometr yo‘l bosib bordi

Kanzaslik oila yo‘qolib qolgan itini kutilmagan joydan — bundan ikki yil oldin yashagan eski uyidan topib oldi, deb xabar beradi CNN.

Kleo laqabli to‘rt yoshli labrador kutilmaganda sayohatga otlanib, bundan ikki yil oldin yashagan Missuri shtatidagi uyi tomon yo‘l oldi. Kleo sayr qilib yurganida uning egalari itning yo‘qolgani haqida e’lon bergan.

Kleoni uyning yangi egasi topib olgan. “Rafiqam bilan ishdan qaytib kelsak, Kleo eshik yonida yotgan ekan. O‘ylashimcha, u nimanidir kutib yotardi”, — deydi uyning yangi egasi Kolton Maykl.

Itda bo‘yinbog‘ bo‘lmagan, biroq u yaxshi parvarish qilingani sabab Maykl uni uyda boqilgan deb gumon qilgan. U Kleodagi chipni topib, skanerdan o‘tkazgan va egasining familiyasini bilib olgan. Mayklning ayoli it egasining familiyasi uyning oldingi egasini bilan o‘xshash ekanligi payqab qolgan. Shunda Maykl Facebook’ka kirib, u yerdan it yo‘qolgani to‘g‘risidagi e’lon topgan.

“Men unga itini topib olganimizni ma’lum qildim. Unga qayerda yashashimizni aytganimdan so‘ng u gapini yo‘qotib qo‘ydi”, — deydi Maykl.

CNN ma’lumotlariga ko‘ra, Kleo 90 kilometrdan ortiq masofa bosib, Kanzasdagi uyidan Missuridagi eski uyiga yetib borgan. U bu kabi masofani, yo‘ldagi ko‘priklar va daryolarni qanday qilib bosib o‘tgani noma’lum.

Avvalroq Peruda vafodor it bir necha kundan beri kasalxona oldida koronavirusga chalingan egasini kutayotgani to‘g‘risida xabar berilgandi.