PSJ klubi va Fransiya terma jamoasi sobiq bosh murabbiyi Loran Blan “Barselona” boshqaruviga tayinlanishi mumkin. Bu haqda L’Equipe’ga asoslanib Diario Sport xabar qilmoqda.
Manbaga ko‘ra, “Barselona” rahbariyati mutaxassisga Kike Setyenning o‘rinbosari sifatida qaramoqda. Ta’kidlanishicha, Blan “Barselona”da ishlashni xohlamoqda.
“Barselona” sport direktori Erik Abidal va uning yordamchisi Ramon Planes Blan variantini ma’qullamoqda. Rahbariyatga mutaxassisning to‘pni egallab turishga qaratilgan o‘yin uslubida ishlashi ma’qul kelmoqda. “Barselona” mazkur uslub klubning g‘oyalariga to‘liq mos tushadi degan fikrda.
54 yoshli mutaxassis 2016-yildan buyon ishsiz yuribdi. Bu esa Blanning moliyaviy talablariga ham ta’sir qilishi mumkin. Mutaxassis ishga ega bo‘lish uchun katta bo‘lmagan maoshga ham rozi bo‘lishi mumkin.
Fransiya nashrining 22-iyul kungi muqovasi mana shu mavzuga bag‘ishlandi.
Eslatib o‘tamiz, Blan uchun “Barselona” begona emas. U 1996 va 1997-yillarda katalon klubi safida harakat qilgan.
Avvalroq portugaliyalik futbol agenti Jorje Mendesh “Barselona”ga Blan variantini taklif qilgani xabar qilingandi.
Murabbiylik faoliyatini “Bordo”da boshlagan mutaxassis 2008/09-yilgi mavsumda klubni Fransiya chempioniga aylantirgan. Keyinchalik PSJ bilan uch marta Liga 1 bosh sovrini, uch martadan Fransiya Liga Kubogi va Superkubogi hamda ikki bor mamlakat Kubogi sovrinlariga ega chiqqan. Shuningdek, u 2010—2012-yillarda Fransiya terma jamoasini boshqargan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)