Тошкент шаҳар тез тиббий ёрдам станцияси шифокори Нуриддин Зоҳидов фаолияти билан боғлиқ асосий муаммолар ҳақида фикр билдирди. У бу ҳақда 18 июль куни «Ўзбекистон 24» телеканалининг «COVID-19. Вазият» дастурига жонли эфирда берган интервьюсида айтиб ўтган.
«Тез ёрдам хизматига 100 та қўшимча машина берадими, 300 та берадими, 400 та берадими, фарқи йўқ, агар асоссиз чақирувлар бўлмаса, ҳозирда мавжуд машиналарнинг ўзи ҳам етарли. Асоссиз чақирувлар бўлмаса, етарли. Дори-дармон ҳам етарли. Агар асоссиз чақирувлар бўлмаса, бизда ҳамма нарса етарли.
Энди, тана ҳарорати 37 даражага кўтарилса ҳам менга укол қилиб қўйгин дейди, қон босими 10-20 кўрсаткичга ўзгарса ҳам укол қилиб қўйгин дейди, лекин кечириб қўясиз, уларга бунинг кераги йўқ. Асосий ресурс мана шунақа асоссиз чақирувларга кетиб қолади: Тез ёрдамнинг, машинанинг, докторларнинг вақти кетади, дорилар кетиб қолади.
Тез тиббий ёрдам хизматида бундай асоссиз чақирув ҳолатлари доимо бўлади. Лекин чақирув бўлганидан кейин, буни ҳеч ким йўқ қила олмайди, биз боришимиз керак. Кеч қолиш ҳолатлари камдан кам бўлади, йўлда бирор ҳолат бўлса, тиғиз вақтларда тирбандликка тушиб қолсак сал кечроқ боришимиз мумкин.
Йўлларда ҳайдовчилар тез ёрдам машиналарига йўл беришяпти — охирги бир йилда бу борада яхши томонга ўзгариш жуда катта. Лекин машиналар ҳам жуда кўпайиб кетган, кўп жойларда йўллар таъмирланяпти. Ҳозир постлар қўйиляпти, у ерлардан бирпасда ўтказиб юборишяпти, лекин ўша асоссиз чақирувлар бўлмаса, тез ёрдам машиналари вақтида етиб боради», – деган Нуриддин Зоҳидов.
Аввал Нуриддин Зоҳидовнинг Тошкент шаҳрида сўнгги кунларда тез тиббий ёрдам хизматига тана ҳароратининг кўтарилиши билан боғлиқ чақирувлар кескин кўпайганини билдиргани, COVID-19 касаллиги «кўпчилик одамларда шамоллашдек ўтиб кетиши»ни айтгани хабар қилинган.
Шунингдек, интернетда Тошкентда тез ёрдам ходимлари хонадонга бориб, битта «заявка»га фақат бир нафар беморни текшираётгани ҳақида видео тарқалган, кейинчалик коронавирусга қарши кураш штаби аъзоси Феруза Ҳамробоева АОКА ҳузуридаги штабда ташкил этилган брифингда ушбу ҳолатга изоҳ бериб, Тез ёрдам ўз номи билан тез ёрдам экани, битта одамга келган ‘заявка’ бўйича мана шу бригадага вақт ажратилиши, тез ёрдам вакиллари битта чақирув бўйича фақат битта беморни кўриш ваколатига эгалигини билдирганди.
Изоҳ (0)