Соғлиқни сақлаш вазирлиги, АОКА, Ёшлар иттифоқи ҳамда Миллий масс-медиани қўллаб-қувватлаш ва ривожлантириш жамоат фонди томонидан таъсис қилинган «КоронавирусИнфо» Telegram канали Ўзбекистонда карантиннинг 31 августгача узайтирилганини инкор қилди.
«Ижтимоий тармоқлар ва Telegram каналларида тарқатилган Ўзбекистонда карантин тартиби 31 августга қадар узайтирилиши ҳақидаги хабарлар ёлғон ва ҳақиқатга тўғри келмайди.
Эслатиб ўтамиз, аҳоли ўртасида ёлғон ахборот тарқатганлик учун жавобгарлик мавжуд», – дейилади каналдаги хабарда.
11 июлда Республика махсус комиссиясининг қарори билан аҳоли ўртасида коронавирус инфекциясининг тарқалиш занжирини узиш мақсадида Ўзбекистонда навбатдаги карантин чекловлари жорий этилган.
Ундан аввал 8 июлда Ўзбекистонда коронавирус билан боғлиқ вазиятнинг кескинлашаётгани сабабли 10 июлдан 1 августгача қатъий карантин чоралари жорий қилинган. 10 июлдан тўйлар, оилавий ва оммавий тадбирлар тақиқланган, автотранспорт ҳаракати чекланган, буюм бозорлари ва болалар боғчалари ёпилган, коронавирусдан уй шароитида даволанаётганларга тиббий ёрдам бериш учун мобил гуруҳлар ташкил этилган, Ўзбекистоннинг барча ҳудудлари эпидемиологик тоифаси «қизил» деб белгиланган.
Шунингдек, 11 июлдаги қарорга кўра, 2020 йил 18—19 июль ҳамда 25—26 июль (шанба ва якшанба) кунлари бутун сутка давомида республика миқёсида ҳаракатланиш, автотранспорт воситаларининг, шу жумладан, йўналишсиз таксиларнинг ҳаракати тўлиқ тўхтатилган.
18—19 июль ҳамда 25—26 июль (шанба ва якшанба) кунлари аҳолига ўзини ўзи яккалаш ҳаёт тарзига қатъий риоя этган ҳолда ўз уйларида қолиш, давлат органлари ва муассасалари, хўжалик бирлашмалари ҳамда бошқа ташкилотларга — ходимларни ишга жалб этмаслик, ходимларнинг ушбу кунларда уйда қолиши учун шароит яратиш тавсия этилганди.
Изоҳ (0)