Lamborghini’niki kabi eshiklarga ega dunyodagi eng past bo‘yli “Niva” taqdim etildi (video)

YouTube’dagi Iling Show kanali videoblogerlari dunyodagi eng past bo‘yli mashinalarni yaratish bilan shug‘ullanadi. Hozirga qadar ular eng past “Buxanka”, eng past “Gelik”ni yaratgan bo‘lsa, bu safar navbat eng past “Niva”ga yetib keldi.

Kanalda mazkur loyihaning final qismi chiqqan bo‘lib, avtomobilning tashqi ko‘rinishi va saloni yakuniy ko‘rinishga kirgan. Buning uchun noodatiy usulda bo‘yalgan kuzov zirhli plyonka yordamida himoyalangan.

Shuningdek, mashinaning barcha oynalari shaffof reklama plastigidan ishlangan, salon esa qizil karpet bilan qoplangan.

“Niva”ning balandligi shu qadar kichraytirilganki, old g‘ildiraklar kapotdagi maxsus teshiklardan chiqib turadi. Dvigatel ham xuddi shunday. Eshiklari esa Lamborghini’niki kabi ochiladi, yukxona eshigi kuzovga parallel ravishda yuroqiga suriladi.

Avvalroq rossiyalik blogerlar oyoqlari bilan qadam tashlab yuradigan “Jiguli” yasagani to‘g‘risida xabar berilgandi.