Italiyaning Ares Design tyuning-atelyesi “billur” avtomobil yaratish borasidagi rejasi bilan bo‘lishdi. Noodatiy loyiha Fransiyaning Lalique billur ishlab chiqaruvchi kompaniyasi bilan amalga oshiriladi, deb xabar beradi Motor.
Noodatiy loyihaning maqsadi — o‘tmishdagi avtomobilni zamonaviy texnologiyalar yordamida yaratish. Hozircha mutaxassislar aynan qaysi model yaratilishiga oydinlik kiritmagan. E’lon qilingan suratga ko‘ra, u retro uslubdagi biror rodster bo‘lishi kerak.
Shuningdek, tizerdan ko‘rish mumkinki, sportkar uzun kapotlari va yumshoq yig‘ma tomi bilan ajralib turibdi. Bundan tashqari, qayta yaratiladigan retro avtomobil xromlangan yon oynalar va eshik tutqichlariga ega bo‘ladi.
Avtomobil yaratish va uning dizayni bilan Ares Design’ning italiyalik tyunerlari shug‘ullanadi. Fransiyaning Lalique kompaniyasi esa o‘z navbatida, model uchun noyob billurlarni yaratadi. Mutaxassislar mazkur noodatiy loyihani 2020-yil oxiriga qadar yakunlashni rejalashtirmoqda.
Avvalroq Gretsiyada tom qismi metall shishadan ishlagan, 3000 ot kuchiga ega giperkar yaratilgani to‘g‘risida xabar berilgandi.
Izoh (0)