Toshkent shahri hokimligi va Sog‘liqni saqlash vazirligi tibbiy uskunalar va tibbiy maqsadda foydalanish uchun Damas avtomobillarini sotib oldi. Bu haqda shahar hokimligi matbuot xizmati xabar berdi.
“COVID-19 pandemiyasi bilan samarali kurashish uchun shifoxonalarni zarur resurslar bilan ta’minlash va moddiy-texnik bazasini mustahkamlash maqsadida Toshkent shahar hokimligi va Sog‘liqni saqlash vazirligi tomonidan 40 dona o‘pkani sun’iy nafas oldirish apparatlari, 120 dona bolalar uchun va 80 dona kattalar uchun SIPAP apparatlari, 70 mingta kombinezon, 70 mingta niqob, 20 mingta bahila, 5 mingta qalpoq, 3 mingta ko‘zoynak, 150 mingta qo‘lqop xarid qilindi”, – deyiladi xabarda.
Shuningdek, 50 dona Damas rusumli avtomobillar xarid qilingan bo‘lib, ulardan 25 tasi tez tibbiy yordam xizmatiga, 23 tasi tumanlar SEOMlariga, 2 tasi ruhiy kasalliklar shifoxonalariga taqsimlanishi ma’lum qilingan.
Eslatib o‘tamiz, 15-iyul kuni Prezident Shavkat Mirziyoyev ishtirokida videoselektor bo‘lib o‘tdi. Selektor davomida koronavirus tarqalishining oldini olish va davolash bo‘yicha Toshkent shahridagi ishlarni talab darajasida tashkil etmagani, epidemiologik vaziyatning salbiy o‘zgarishlariga tayyor bo‘lishni ta’minlamagani, bu kasallik bilan “pastga tushib” mukammal shug‘ullanmagani uchun Toshkent shahri hokimi Jahongir Ortiqxo‘jayev va sog‘liqni saqlash vaziri Alisher Shodmonovga hayfsan e’lon qilindi.
Mavzuga doir:
- Alisher Shodmonov O‘zbekistonga COVID-19’ga qarshi dori vositalari olib kelinganini ma’lum qildi
- O‘zbekistonda koronavirus epidemiyasining ikkinchi to‘lqini kechayotgani rasman tan olindi
- Prezidentdan hayfsan olgan Jahongir Ortiqxo‘jayev Toshkentdagi koronavirus bemorlari davolanayotgan kasalxonaga bordi (video)
Izoh (0)