Monopoliyaga qarshi kurashish qo‘mitasi boshqarma boshlig‘i 40 yoshida vafot etdi

Monopoliyaga qarshi kurashish qo‘mitasi Qonun hujjatlarini va davlat organlari qarorlarining raqobat muhitiga ta’sirini baholash boshqarmasi boshlig‘i Sanjar Abduqodirov vafot etdi. Bu haqda qo‘mita matbuot xizmati xabar berdi.

“Monopoliyaga qarshi kurashish qo‘mitasi o‘zining yetuk va tajribali mutaxassisidan ayrildi… Kimgadir aka, uka, do‘st va hamkasb bo‘lgan yaqin qadrdonimiz biz sizni sog‘inamiz! Ilohim oxiratingiz obod bo‘lsin”, — deyiladi qo‘mita xabarida.

Sanjar Abduqodirov 1980-yilda Namangan shahrida tug‘ilgan. Namangan muhandislik iqtisodiyoti instituti va Prezident huzuridagi Davlat va jamiyat qurilishi Akademiyasini bitirgan. “O‘zLiDep” partiyasi a’zosi bo‘lgan.

Uzoq yillar davomida Qimmatli qog‘ozlar bozori faoliyatini muvofiqlashtirish va nazorat qilish, Davlat mulki qo‘mitasi va Xususiylashtirish, monopoliyadan chiqarish va raqobatni rivojlantirish davlat qo‘mitasida faoliyat olib borgan.

Vafotiga qadar Monopoliyaga qarshi kurashish qo‘mitasi Qonun hujjatlarini va davlat organlari qarorlarining raqobat muhitiga ta’sirini baholash boshqarmasi boshlig‘i lavozimida mehnat qilayotgan edi.

Qo‘mita xabarida uning o‘limi sababiga oydinlik kiritilmagan.

Avvalroq Davlat xizmatlari agentligi Navoiy viloyati boshqarmasining mas’ul xodimi Adhamjon Dehqonov 61 yoshida koronavirusdan vafot etgani xabar berilgan edi. Sog‘liqni saqlash vazirligi bu xabarni hali rasman tasdiqlaganicha yo‘q.

15-iyul kuni O‘zbekiston Ichki ishlar vazirligi matbuot xizmati 13 va 14-iyul kunlari tizimning ikki nafar xodimi vafoti etganini ma’lum qilgan. Jumladan, 13-iyul, dushanba kuni Toshkent shahar IIBB Axborot texnologiyalari, aloqa va axborotni himoyalash bo‘limi boshlig‘i o‘rinbosari, mayor A’loxon Shomahmudovning vafot etgani, 14-iyulda esa IIV Migratsiya va fuqarolikni rasmiylashtirish bosh boshqarmasi bo‘limi boshlig‘i podpolkovnik Shavkat Nafasovning vafoti munosabati bilan ta’ziya e’lon qilgandi. SSV oradan qariyb bir sutka vaqt o‘tganidan keyin ushbu xabarni tasdiqlab, 70 hamda 71-o‘lim sifatida o‘z statistikasiga qo‘shgandi.